我最愛的 威尼斯人 ，酒店房間翻新後首次入住家庭套房，房間大了光猛了，住得特別舒服! 另外到了「冰之歷奇冰雕展覽」，凍住同「功夫熊貓3」及「魔髮精靈」打卡，過咗2日1夜開心之旅
可以再一次過大海癲番晚真係好開心 #多謝威尼斯人！
這次旅程算是哥哥考試前最後一次大玩特玩，我哋來到威尼斯人酒店，先到VIP Lounge休息及Check-in，吃過茶點醫醫肚，我哋就起程到「冰之歷奇冰雕展覽」，知道可以睇見用冰造成的Trolls，芊芊就已經千萬個期待。
進入酒店內，沿路都見到很多「冰之歷奇冰雕展覽」的打卡位
去到歌劇街又俾我哋撞到佢啦「荒失失奇兵」的角色「朱利安」
平時每次上到購物中心都會當失路的我(因為每條街都一樣樣，真係同一天空下)，今次終於知「訂」冇行錯啦！
真係未出發先興奮，將要見到咁多個夢工場主要角色，而且仲係用冰製成，影相一定超美！
但最意想不到的，原來場館內的溫度只有零下8度 ~~
雖然進場前可以借用大厚雪褸，但係都仲係超凍…我只係着咗短衫短褲！幸好醒目的媽咪已替小朋友預備了所有禦寒衣物，如果凍到佢哋病咗我就大罪喇～
展覽分為7個區域，先有為人熟悉的動畫馴龍記；荒失失奇兵；魔法精靈；古魯家族；功夫熊貓及史力加，最後一個區域是功夫熊貓的阿寶設有一系列的主題遊戲、美食、紀念品等攤位
先進入第一個區域馴龍記，哥哥雖然未睇過呢套動畫，但係唔知點解就對佢情有獨種，可能佢特別鍾意飛龍，所以見主角騎住條飛龍就自然鍾意
兩個好積極咁要求我幫佢哋影相，要每一個冰雕都影低，好似唔記得咗自己身處零下8度的地方
見佢哋兩個咁鍾意，一於等佢哋乖乖地嗰陣，就Download落嚟俾佢哋睇啦
去到第2區，係佢哋鍾意的「荒失失奇兵」，主題用上了第3集的馬戲團背景
芊芊好識得配合製造效果，同「荒失失企鵝」影相立即擺番個企鵝Pose
萬眾期待的「魔髮精靈Trolls」終於到了! 第3區唔單止係一個展覽，仲有得玩瀡冰梯
這區域真的超美，因為「Trolls」呢套動畫本身都充滿好多色彩繽紛的場面
可以同一眾「Trolls」角色影相，兩個超開心! 我哋今次嚟澳門前一日，專登同佢哋溫溫書睇多次「Trolls」，嚟到之後可以見到在電視中出現的角色，所以特別興奮
其實每次播這套動畫，我都未試過得閒靜靜坐低睇，所以咁多個角色，佢哋兩個仲熟過我
有睇過「Trolls」的朋友，可以唔知主角叫咩名，但係一定唔會唔識「碧姫」，仲要係扮靚靚版的「碧姫」，點解冇「阿吉皇子」架!?
企喺咁大隻「碧姫」前，佢哋兩個真係好似變咗「魔髮精靈」咁細隻
佢哋等到流哂口水，終於可以試吓瀡冰梯啦，沿旁邊的樓梯行上去，冰梯的上層及下層都有一大隻職員確保安全，唔知佢哋幾耐換一次班，因為留喺度咁耐都真係堅凍
兩個瀡完再瀡，突然唔記得哂自己啱啱仲不停話「好凍! 好凍!」，真係有得玩就乜都得。
連媽咪都要試一試，佢話真係好刺激超爽! 我本來仲以為會玩到成條褲濕哂，可能因為在零下8度環境之下，加埋有大褸墊住，原來又唔係想像中咁樣。
玩夠瀡夠之後，我哋就穿過冰橋隧道去到第4區的「古魯家族」
動畫的場景係熱帶雨林深山洞穴，同呢度咁凍的環境想比之下真係好大分別，哈哈~
去完呢個冰雕展我決定要同小朋友睇埋呢套「古魯家族The Croods」
鏡頭一轉去到第5區啦! 係我哋最鍾意的功夫熊貓，場景係最新的第3集，這集多咗個大反派「天煞」佢係一隻大牦牛，其實有d似牛魔王
離開「功夫熊貓3」區之後，遇上兩塊「魔髮精靈」冰雕打卡位，兩個都唔執輸行埋去影一影，不過辛苦媽咪喺後面抱住，哈~~
另外一邊有動畫裡面幾多粉絲的角色，三隻小豬、木偶同埋紅到可以自己有一套動畫的「無敵貓劍俠」長靴貓
見到咁大隻史力加，全身綠色好似蜜瓜味雪條咁! 仲有唔少得佢好拍檔「驢友」啦!
出番嚟休息一陣，飲啖熱水保保暖先! 就連我部相機同鏡頭都充滿霧氣
交還大褸後，我哋都留在最後這個「功夫熊貓阿寶」區影影相玩玩攤位遊戲
這個「冰之歷奇冰雕展覽」去到暑假前就完啦(展覽至7月9日)，小朋友一考完試就帶佢哋嚟玩吓啦
部份遊戲都係由「功夫熊貓學堂」搬過嚟玩，呢個「智闖敵陣」超好玩，小朋友要穿過紅線陣，但唔可以碰到線上的嚮鈴! (唔係打邊爐嗰D呀)
呀芊好小心咁一步一步爬過紅線陣，相反哥哥就一跑過去跨唔過觸碰全部鈴叮噹! 如果真係全部機關，你早玩完了，如果每套戲都有個論盡仔，呢個角色哥哥非你莫屬。
除咗動態遊戲，都有好多靜態活動，呢邊有幾個簡單的工作坊，小朋友可以喺度剪剪紙、填顏色、紙上遊戲，仲有Photo Hunt! 我哋全部都拎一份留番在酒店房或者餐廳先玩
呢度有個神秘裝置，原來埋去睇係播緊「功夫熊貓3」的Trailer
仲有個「百發百中」遊戲，將一個一個大包掉向翡翠僵屍!
見佢哋玩得咁開心，今年暑假一於帶佢哋入戲院睇「功夫熊貓3」啦!
落咗船之後就去冰雕展，終於可以番入嚟酒店房抖一抖，一開門入到房，發現威尼斯人酒店的家庭套房都翻新了，因為牆身周圍都有好多白色位，所以感覺光猛咗好多!
另外所有插蘇位置都換了全新的，仲有USB插頭可以方便Android/iOS手機叉電
安頓好之後，我哋就準備去食Buffet同埋之後去睇「Thriller Live」啦
由威尼斯人可以直接步行至巴黎人劇場都唔駛10分鐘，實在太方便了! 今次係我哋第二次睇「Thriller Live」，上次芊芊太攰只係睇咗一半就離場，而且佢都唔係太熟悉MJ的歌
但係自上次睇完後，哥哥好鍾意唱MJ的歌，所以喺屋企就得閒會聽吓唱吓，今次兩個都做足準備嚟睇，實行要每首都跟住唱!
上次媽咪話好想買番頂MJ帽俾佢哋兩個戴，所以今次佢好豪爽咁買咗兩頂，話可以第日生日會聖誕節都戴得喎，我心諗「當一個人想買一樣嘢的時侯，真係咩理由都噏得出」
好在頂帽原來識著燈(自我安慰貴得有道理)
今次有埋頂帽扮得特別似!! 呀芊呀….你次次都指錯邊架
原來加咗頂帽真係型咁多，哥哥真係大個咗，知道咩叫有型…
今次完咗之後仲可以同幾無主要表演者影相tim ~~
意猶未盡，兩個繼續邊番房邊跳舞，仲將睇SHOW爆出嚟的皺紙條放入頂帽度扮MJ條公仔麵頭髮，真係笑死我
妹妹好想整到好似哥哥咁拖地，哥哥就一於幫佢Set頭
番到入房繼續Thriller Live…今晚唔駛瞓喇！
到咗第二朝，我哋都瞓到自然醒，真係冇嘢幸福得過。然後飲過早茶就出發去玩，我哋上了大潭山郊野公園的免費人造草滑草場，由酒店直接搭的士上去只需$30
其實在黑沙公園也有一個真草滑草場，而且仲有得去水上樂園租艇玩划艇同租小單車玩，不過因為有點遠，而且乘公車也有點耐，怕趕唔切番去搭船走人，所以近近哋再到大潭山呢度玩
雖然係人造草，但係都一樣可以玩得好刺激，職員定時會灑上水在人造草上，因為烈日當空，咁做可以避免曬燶人造草；又正因為有水的關係，滑落嚟時減少咗磨擦，滑得仲快仲暢順!
雖然建議4條行車線，但係大家都係亂滑，只要一有位就瀡落嚟，不過人唔多的關係都唔會太危險!
我想佢哋可以平排俾我影張相，呢兩隻馬騮攪攪陣，專登一前一後唔俾我影到
玩完之後我哋就慢慢行番落山，見到咁多飛機小朋友就最興奮!
沿路行番落山去到機場大概20分鐘，然後再到機場低層截的士番酒店!
取回行李就再到VIP Lounge食少少嘢休息吓。跟住發現居然有糭食喎! 因為過兩日就係端午節，感覺特別貼心!
差唔多時間就上專車到碼頭番香港喇，完成今次澳門兩日一夜之旅! 多謝 Venetian Macao
Photo byCANON 5D Mark IV,Len|EF 24-70mm f2.8L USM | EF 16-35mm f/2.8L III USM
想跟我去體驗其他活動，快D報名親子團，同埋留意專頁公佈詳情啦！
http://goo.gl/forms/CNZMEPoMIWkouK8o2
呀劍評分:10分
呀劍評語:這次沒有編排很多節目，輕輕鬆鬆慢活兩日一夜，有冰雕展睇，有Show睇，又有戶外活動，仲有全新家庭套房同美食，今次旅程十分充實! 大家都快D訂定酒店套票享受番晚
《“體驗夢工場”冰之歷奇冰雕展覽》簡介
“體驗夢工場” 冰之歷奇是由一班來自哈爾濱的世界壹流冰雕藝術家以數千色彩繽紛的冰塊精心雕琢而成的亞洲最大型的室內冰雕展覽。除了更多栩栩如生的夢工場動畫巨星冰雕及震撼澎湃的燈光音響效果外，更設有一系列「功夫熊貓」主題遊戲、美食、紀念品等攤位；您更有機會與“龍戰士” 阿寶及一眾夢工場巨星作零距離接觸、享受一個難以忘懷的「體驗夢工場」之旅。
7大夢工場動畫主題
冰雕展區任務展開；馴龍記；荒失失奇兵；魔法精靈；古魯家族；功夫熊貓；史力加與功夫熊貓阿寶一同體驗趣味十足的冰之歷奇吧！阿寶與一眾夢工場巨星們已蒞臨澳門金沙度假區，準備與你攜手踏上勇者之路，並肩對抗超級大壞蛋天煞。為了讓你變得更加強大，夢工場的英雄們已為你準備了一系列歷險訓練！讓你可以在最愛的夢工場動畫世界之中體驗重重歷險；向維京勇士、魔髮精靈、古魯家族、荒失失奇兵的馬戲團巨星們，以及怪物史力加學習提升內在力量，掌握絕妙之“氣”，為與邪惡天煞的終極之戰做好準備。
地點
澳門威尼斯人®金光會展F館
表演日期
2017年3月16日至7月9日
時間
早上11:00至晚上8:00（最後入場時間為晚上7時30分）
單人門票价格優惠包括:
成人及小童（2至12歲）：澳門幣/港幣 $120
家庭套票：澳門幣/港幣 $312
《Thriller LIVE》簡介
已連續公演8年的THRILLER LIVE不斷推陳出新，風靡英國倫敦西區，至今已踏足全球30個多國家，演出超出5,000場次，逾四百萬觀眾入場欣賞，贏盡讚歎！巨星米高積遜「漫步月球」至國際，最終以澳門作其下一站的「登陸」地點。 最新落成的澳門巴黎人即將呈獻精彩絕倫的THRILLER LIVE，這將是澳門巴黎人正式開幕後，首齣在巴黎人劇場公演的節目。
地點
巴黎人劇場
表演日期
2017年9月30日至11月13日
門票價格
A區: 澳門幣/港幣 $480
B區: 澳門幣/港幣 $280
C區: 澳門幣/港幣 $180
(以上資料更新至文章當日)
