【親子好去處】灣仔 麥當勞 McDonald’s 小小麥職場 體驗日 @港灣道麥當勞分店

今次 小小麥職場 喺全港30間指定分店舉行，「小小麥職場」分別有四個崗位的獨特「職責」包括：(4款顏色代表咗唔同崗位制服嘅顏色)

小小經理：了解餐廳管理，包括檢查食材、實習食品安全程序等

小小咖啡師：製作McCafé飲品

小小推廣代表：學習優質服務之道，在大堂與顧客互動

小小組員：為爸爸媽媽準備食物

今日我哋一早嚟到灣仔港灣道麥當勞坐低食個麥記lunch，職員見到小朋友就即刻上前送個汽球俾哥哥，氹得佢幾開心！

到咗2:30「小小麥職場」開始囉，先著番套型仔制服先！(其實我揀港灣道分店都係因為順路同埋呢度角色係小小咖啡師)

超貼心嘅服務，2-3個人走嚟幫哥哥縛圍裙…有D VIP感覺！Heeee

嘩超型仔！真係唔做得都睇得，我相信如果擺哥哥喺度做生招牌應該都會吸到唔少客

最Surprise係居然見到林嘉欣，原來佢同囡囡都參加咗「小小麥職場」又係同我一樣揀咗港灣道分店扮小小咖啡師

睇見枱上面已經預備一切用具準備落手啦…

不過大家先嚟個大合照同埋去洗洗手

好開心終於可以入到嚟麥當勞㕑房參觀吓…不過我哋入嚟係為咗洗手啫！所以冇特別周圍睇

人哋叫你洗手要洗20秒，呢個哥哥冇咩耐性求求其其洗就算，話佢要洗耐D，跟住反話番我你都係洗幾秒就算啦…冇哂面…！身教真係好重要

幾杯熱泡奶已經預備好，McCafe哥哥即場為我哋示範

McCafe哥哥先教我哋同個模隔開朱古力粉，砌出唔同造型一杯獨特嘅朱古力泡沫鮮奶！

每造出一杯小朋友同家長都在旁呼叫…太誇張了吧～哈哈！

另一個方法係用朱古力漿唧落去，再用纖畫過朱古力漿造出兩串心心圖案

到哥哥落手做啦…希望你唔好太過失禮啦

不過McCafe哥哥太錫佢啦，幾乎都係扶住佢隻手去造…不過唔緊要啦，對小朋友嚟講佢都係覺得係自己造出嚟嘅

第二杯聖誕雪鹿又整得幾靚喎

自己整完都係親自試一試味，呢D咪叫自作自受囉！佢話好苦喎…哈哈

之後未趕得及唧埋朱古力漿，所以轉頭再做過！第二個環節先去練習一下禮儀同客人講「歡迎光臨」

各位小小咖啡師在門口排好隊，姐姐教大家舉起右手齊聲講「歡迎光臨」！呢個動作對呢班咁怕醜嘅小朋友嚟講真係難….

到咗重要環節部份就係要扮收銀員為客人點餐，但係呢個火爆職員服務態度其差呀，可以炒咗佢！應該問我飲咩，佢就叫我飲「冇嘢」；應該叫我坐低等餐，我話冇位，佢叫我坐地下！有片有真相

你都有今日，仲要送餐嚟服務我…但係個餐放低唔夠半秒就同我講要去廁所，結果中途帶呢個咖啡師去小便

番到嚟McCafe哥哥補番同Hysan唧唧朱古力漿畫圖案喺泡沫鮮奶上，人哋幾個哥哥姐姐問佢想畫咩，佢衝口而出話要畫比卡超，即刻全場靜哂！然後McCafe哥哥話不如話精靈球啦，精靈球裡面都有比卡超㗎！跟住極不願意扁哂咀咁接受，笑到旁邊嘅姐姐肚痛

精靈球完成！說好的比卡超呢？要飲到去裡面先會見到㗎…哈哈

最後頒發證書，哥哥成為小小麥職場嘅小小咖啡師，你今日可以改名造陳豪啦！

最後最後一班小小咖啡師在門口俾所有家長影影影…好開心嘅一天(因為見到林嘉欣～)

參與餐廳名單：

Photo byCANON 5D Mark III,Len|EF 24-70mm f2.8L USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分:8分

呀劍評語:今年首次舉辦嘅小小麥職場，好榮幸有得參與其中，希望將來可以有番開放日直接入廚房製作漢堡飽，邊整邊食啦…哈，如果套制服有得拎埋走真係型到跌渣！

活動日期：

2016年9月25日 (星期日)

活動時間：

提供以下2個時段選擇 (每場參與之小朋友及家長合共最多10人) ：

第一場：下午2時半至4時

第二場：下午4時半至6時

報名日期：2016年8月30日至9月19日 (先到先得，額滿即止)

報名方法：需親臨全港30間參與餐廳索取申請表，並於填妥後交回餐廳。參加者必須以親子組合登記，每組由1名6歲至11歲的小朋友及1名家長或監護人組成。

費用：全免

(以上資料更新至文章當日)

Facebook專頁:呀劍萬帥 kimfamilytravel
Blog網誌 :kimfamilytravel.blogspot.hk