【越污糟越快樂】Artistic Mess
就好似之前我講過，小小豬真係一個零畫畫興趣同雲藝術天份嘅小朋友，雖然我都曾經有帶佢去參加下啲畫班，不過始終都係未遇到位老師可以幫佢增加依個畫畫興趣。
另一原因就係我唔想做怪獸家長去迫佢做啲佢完全唔鐘意嘅嘢，所以我都冇再好刻意咁同佢出去上興趣班，平日係屋企同佢做多啲同畫畫有關嘅活動，希望可以慢慢幫佢改善。
要令小小豬對畫畫有興趣，咁就一定要由要等鐘意先得，有咩好得過從遊戲中學習呀，有得自己鐘意點玩就點玩，小小豬就實鐘意，所以帶佢嚟Ludus Club參加Artistic Mess，等佢可以跟住老師指示，用油彩係大型畫紙上嚟個污糟一番啦~
嚟個污糟畫之前，老師就先同一班小朋友嚟個熱身遊戲，就係將手掌塗上油彩，之後印係牆上大畫紙上~
小小豬有幾投入，睇佢熱身遊戲時就已經頭髮都有油彩就知啦~
用手掌小試牛刀之後，就開始加難度，老師係小朋友手上塗上油彩，之後盲係牆上大畫紙碌..碌…碌咁將顏色塗上去~
之後老師就準備左唔同形狀嘅工具，請小朋友塗係地上畫紙。平日唔鐘意幫手掃打嘅小小豬竟然揀左個拍，不過就係扮掃地咁將油彩塗上畫紙上。見佢依個玩法都唔知好嬲定好笑，但其實創意依樣東西都冇對與錯，最緊要係佢可以用自己方法去做而又係玩得投入嘛~
掃左一陣地之後，老師又分別拎出另一種工具，教小朋友彈印~
不過，小小豬對彈印就興趣不大，佢都係鐘意拎住個噴水樽噴啲油彩~
嘩…開始入戲肉，依個時候老師每人俾一支油彩，叫小朋友們吱向家長。我聽到就當然係即刻九秒九閃人，不過原來小小豬個目標都唔係我，佢走去吱啲老師，佢真係大膽都冇朋友呀(不過後來問返佢，原來係老師吱佢先呀…哈哈哈)~
終於嚟到終極污糟，就係小朋友坐係盆油彩，等全身都有顏色，然後就嚟個終極碌碌碌。依個時候一班老師仲同小朋友齊齊互動，氣氛真係超正呀~
最後老師就用小朋友集體創作嘅污糟畫，齊齊扮火車呀~
由頭至腳…由外至內(真係連內褲仔都濕晒)，基本上全身冇一個地方係冇顏料，真係想幾污糟就有幾污糟呀~
好在我一早收到風係咁污糟，所以小小豬身上那套衫都係一啲唔多合身嘅衫，玩完報廢都冇咁肉痛。 老師們都好細心，為各大小朋友提供暖毛巾等我地可以擦乾淨身上嘅油彩~
雖然係玩得非常污糟，不過小小豬就玩得超級盡興，全場冇時停周圍塗，佢仲叫我買張大畫紙返屋企再玩過！(係屋企…當然係NO WAY啦)
真心覺得依個活動係唔錯，而且又真係唔貴$250就可以1成人及1小童參加，可以瘋狂咁去污糟一個鐘，依啲機會平日我地真係唔機會可以試(完全冇可能發生係屋企入面啦)。所以如果夾到時間，我想都帶小小豬嚟多幾次，等佢可以由另一個角度去感受畫畫興趣！
