【鬧市中的單車樂】九龍城 賈炳達道公園單車徑
出門口時真係陽光勁好，到我地參加完活動之後先發現原來曾經落過雨，一見地面上有濕濕地時，小小豬都有丁點失望。但我見天氣都唔錯，太陽伯伯已經出返嚟，再加上地上水氹又唔算好厲害，只要我哋慢慢踩都應該係唔會有問題。所以我哋就向 賈炳達道公園單車徑 出發啦！
其實依個單車徑我地都唔係第一次嚟，早係小小豬細細個兩歲多時都已經嚟玩，不過嗰時就係坐DADDY車尾，冇得自己踩，依家大個仔就可以嚟自己踩。嚟 賈炳達道公園單車徑 都真係幾方便，係九龍寨城公園同九龍城廣場旁邊，而且入口就係大路旁，所以絕對係一個鬧市中可以享受單車樂嘅好地方呀！
未出發前當然要認下啲路牌先啦~
我覺得公園又幾好，將啲路牌展示晒出嚟，等小朋友一陣踩單車時可以留意一下，咁踩嘅時候就更加安全啦~
由於我哋有揸車，所以就可以自己帶部戰車嚟玩。不過其實單車徑內都有單車租借服務，租車費用都係大約$30至$40一個鐘(租車時另加按金)，所以如果有需要或者即興時，都可以嚟租車玩呀~
好啦….可以開始啦，由於整個公園係以單線行車，所以其實都幾安全呀~
單車徑有平路，亦有幾個斜路路徑，同時三條唔同斜坡路段嘅天橋係整個單車徑穿插~
沿路都有好清楚嘅地標，只要跟住嚟踩咁就冇有怕啦~
續下頁
當踩上天橋位時，又有路牌提示要減速慢駛~
一落左橋小小豬又嚟努力向前衝了~
其實周圍環境都真係唔錯，周圍都係綠油油，我沿途跟住小小豬單車尾行，都覺得好輕鬆(當然仲係感覺有啲熱啦….哈哈哈)。雖然有一片小草地，不過我哋唔好行上去踩啲草呀，因為有告示寫住唔可以踩上去，要守規則同愛護環境呀~
恨左踩單車好耐嘅小小豬，真係玩得特別開心呀~
仲特別神氣添~
下頁：內有圓型單車練習場
小小豬慢慢踩，大約20分鐘左右就係單車徑內踩左一個圈啦~
除車一條單程單車徑之外，仲有一個圓型單車練習場，應該就係用嚟練習花式單車嘅地方，見冇人就俾小小豬入去跟住啲箭咀踩一轉啦~
係單車徑只係踩一轉又點可以滿足依個小小豬呀，不過我行左一轉之後都真係勁攰，所以接下來就由DADDY陪佢啦。依隻百厭豬以為自己好勁，見到同場有其他哥哥企度踩佢又嚟跟住學~
當然咁危險係唔可以啦，最後就乖乖地坐好慢慢踩啦~
如果小朋友太細個，或者係初學嘅小朋友，就可以入嚟依個兒童單車遊樂區，咁就可以練習多啲熟多啲，先再出去單車徑玩啦~
