【鮮蝦菜粒碎烏冬】

因為我自己有對海鮮敏感的情況發生，所以我都唔多比海鮮比阿BU食（鮮魚除外）。
但我知道鮮蝦其實有好多營養㗎，例如奧米加3脂肪酸和高蛋白質。
既然咁岩喺雪櫃有新鮮大蝦，所以就整咗呢個菜式，最後佢無敏感亦食得好開心 ^_^
但各位爸媽煮人要記住，海鮮食材必需要新鮮，肉質要有彈性，沒有「霉」的質感或酸味的。
如果小朋友之前未食過海鮮，爸媽第一次餵食時就要逐少比佢地試，確保baby冇敏感先再繼續～

祝各位小朋友Bon appetit!!

【鮮蝦菜粒碎烏冬】適合2歲半或以上小朋友食用
材料：
節瓜粒、番茄粒、粟米粒、鮮冬菇粒・・・各約1湯匙
鮮蝦・・・・・・1-2隻（去殻取肉，去腸，切粒）
即食烏冬・・・・1/2包（略切碎）
蠔油・・・・・・1/2茶匙
麻油・・・・・・少許

做法：
1）熱鑊下少許油，下節瓜、番茄、粟米和冬菇，加入1-2湯匙水，以中火炒熟材料。
2）鑊內加入鮮蝦拌炒熟，再加入烏冬碎，加入少量清水拌煮約1分鐘，最後拌入蠔油和麻油調味，完成。