你今日飲咗未？
細佬 Par Par 就讀嘅文娜雅拔幼稚園，就帶學生參觀位於大埔工業村嘅益力多工場，Par Par 除咗可以參觀生產線同飲益力多外，更深入認識各種細菌，以及飲食習慣點樣影響自己嘅 poo poo，過咗一個好充實嘅下晝！
小朋友一入到去樓底高，機器又多嘅工場，當然係嘩嘩聲啦，所以大家都留心聽住導賞員姐姐嘅介紹，落足眼力睇整個包裝過程。
進入廠房生產線嘅時候，所有人都要經過一部巨型風機，只要企定定喺裡面，就會自動送出強風，吹走身上所有頭髮碎同塵埃，好似沖完涼咁樣乾淨晒，確保廠房入面嘅衛生，而 Par Par 就吹得好開心，仲話想吹多幾次呀哈哈！
Par Par 平時喺屋企最多都係見到一、兩排益力多，今次可以睇到幾百幾千樽益力多喺生產線上面移動，的確係超震撼，所以去到工場嘅影相位都好興奮，仲愛上咗「益力多人」㖭！^^
同文娜雅拔幼稚園 Ms. ChiChi 校長開心合照。
唔講唔知，其實益力多係由砂糖、葡萄糖、同脫脂奶製成，而喺講座入面，當導賞員姐姐話，益力多嘅水係水喉水，同埋有活性乳酸菌等細菌嘅時候，原本舉高手話好鍾意飲益力多嘅 Par Par 同大部份小朋友，都覺得有啲驚，縮返低隻手，好搞笑！XD
跟住導賞員姐姐就話，其實活性乳酸菌係好嘅細菌，可以增強腸臟蠕動、改善排便狀況；增加益菌、減少害菌及有害物質生成；增強身體抵禦力，叫小朋友唔使驚。
之後透過影片話畀佢哋知道，如果肚仔裏面有壞嘅細菌，排出嚟嘅 poo poo 係爛嘅；如果平時唔食蔬菜，就會係硬嘅；如果有飲益力多，poo poo 就會係正常。
Par Par 聽完之後，即刻同同學仔一齊揸住啲 poo poo……模型細心研究，幾位小朋友圍埋一齊，十足開高峰會咁樣，呢個咁「歷史性」嘅一刻，梗係要影相留念啦！嘻嘻！
今次參與益力多工場，Par Par 同一班小朋友都大開眼界，更加學識一啲關於細菌同健康嘅知識，最開心當然係有得飲益力多啦！:P
