你以為 順產 生完就無事嗎

先唔講生產過程猶如生死邊緣咁可怕，後續嘅折磨簡直令作為新手媽媽嘅茄蛋媽不知所措，期間更導致茄蛋媽同老公鬧咗幾次交，BB剛滿月，身體嘅不適感已經緩和七七八八，係時候同大家爆大鑊。

全身酸痛

生產時用盡全身嘅力量，尖叫、狂抓、狂谷….生完真係無晒力，攤喺病床好似癱咗咁，全身肌肉酸痛，直到第三日先無咁痛，順產就係要出盡奶力，無得避。

會陰傷口痛

剪會陰！茄蛋媽生完都唔知剪咗，可想而知崩潰式陣痛係幾恐怖，但事後更加恐怖嘅係傷口痛，呢個位置真係好攞命，行又痛坐又痛訓又痛，總之咩姿勢都痛。最慘係茄蛋媽有幾聲咳，一咳就全身郁，痛到標眼水，住院期間咳到失禁賴濕好幾次，奉各位產前好好顧好身體。

頭三日喺醫院上落床已經痛不欲生，著褲除褲一舉手投足都會郁到傷口痛到喊，沖洗下體時，摸落似腫晒嘅孖潤腸咁，最舒服嘅動作莫過於凌空成個pat pat ，建議大家唔駛買水泡喇，坐落去擘開個傷口痛到你彈起呀！

另外，心理壓力都會令人好不安，好想知道下面乜狀況，茄蛋媽出院第一日就搵鏡照下體，四個字「亂七八糟」！聽講會陰嘅癒合程度人人唔同，最少痛一個禮拜，茄蛋媽因為有血腫嘅傷口，連埋會陰傷口痛足大半個月。傷口癒合之後會超級痕痕痕痕痕，然後你想R下但又怕痛，簡直係虐待，講到呢度好想尖叫！

子宮收縮

一生完隨之而嚟嘅第一個痛楚就係子宮收縮痛，須知道懷孕九個幾月，子宮泵到波咁大，要縮返原本Size必須經過一段時間同收縮。有人話似經痛，但人人經痛程度唔同，我只能夠話，平時十級痛嘅人，會一樣咁痛吧。

全身發臭
產後身體會排水，明明一直都係冷氣房，但就一直流汗，餵個奶/食個飯/ 沖個涼，就好似長跑完一樣出晒水，連瞓醒起身都發現背脊濕晒，最慘係腋下汗臭程度似臭狐，我一度好擔心會唔會自此有臭狐，原來係唔會嘅，排完一星期水就回復正常，聽講咁樣排汗係好事，可以產後排毒瘦身。

由於茄蛋媽產後腳腫好厲害，飲左一星期紅豆焗水，去腳腫之餘仲去埋身體、面部嘅水腫，好有效，必跟！

腥臭惡露

產後惡露聽過啦，裡面包含血塊、白血球、子宮內膜、胎盤…試想像9個月嘅月經一鑊過流出嚟會點樣，最難頂嘅係長時間包住一塊又厚又長嘅產婦衛生巾，然後惡露味道又臭臭地，感覺下面都要發霉了，好彩茄蛋媽流到BB滿月前幾日就清晒。

乳房嘅悲哀
乳房係另一個最痛苦嘅事情，谷奶痛係我產前無諗過亦完全唔知道嘅一件事，原本以為生完就比奶奶bb食就Ok no problem，無諗過餵奶就係=痛！

首先係谷奶痛，「石頭胸」就係谷奶最好嘅代名詞，谷奶時個胸硬到好似石頭咁，第一次谷奶係產後第5日夜晚，個胸硬到打側訓時掂到張床就痛到彈起！

其次痛係BB啜損嘅痛，損左啜甩晒皮就更加痛痛痛痛痛！唔好睇少呢種皮外傷/ 谷奶嘅痛，係可以迫到人癲！除非較啱BB食奶嘅時間，否則就要出動電泵泵出嚟舒緩谷奶痛。

每日餵奶泵奶又係痛，條頸超痛，因為餵奶泵奶都會向下望，感覺已患上肩周炎！仲有係乳頭啜到好長、乳頭乳雲呈黑青都好惡頂，初初泵奶更會因為想泵多d而狂擠乳房，呢個完全係一個自殘嘅行為。

虎背熊腰大肚腩
產後我無馬上去磅重，反而係醫院照過鏡，見到鏡裡面嘅自己，「慘喇慘喇」，個肚皮又The又黑，用手指督一督個肚皮拋下拋下，產後第五日成個人腫晒，面腫手腳都腫，除左飲紅豆焗水消腫，束腹帶都日日用，但好快就回復，不過腰粗背厚唔可能一時三刻打回原形，重點係漲奶令上圍睇落好巨型，變相成個人變到好壯，暈喇。

茄蛋媽天真地以為生完好快會回復正常，一直都無睇過 「產後症狀」係點，單單係處理身體嘅變化、適應每三個鐘就谷奶控制嘅身體，已經令我就快崩潰，加上嚴重睡眠不足，對於一直樂觀嘅我都憂鬱地喊左好多個晚上。

頭果兩星期成個人精神都將近崩潰，好攰好攰，尤其係茄蛋媽返外家坐月，雖然媽咪照顧三餐、幫bb沖涼，每日煲薑水比我沖涼，但日夜照顧bb都係自己搞掂，老公初初體會唔到當中嘅痛苦，可能以為餵奶啫，餵完佢訓你咪訓囉，其實新手媽媽要面對嘅難題太多了，每日都要學習實踐共同進行，要關注bb頭暈身慶、大小二便、餵奶掃風、習慣佢嘅生理時鐘，自己身體嘅痛楚已經無時間照顧好，甚至連去大便都會係一件好奢侈嘅事，果一刻覺得好委屈！

好彩茄蛋爸每星期放假都會嚟住一晚體驗下坐月湊bb嘅辛酸，茄蛋媽知道好多媽媽產後憂鬱大部分都係因為奶量同埋周邊人無心嘅語言傷害，雖然無奶量不足嘅問題，但精神上嘅折磨都令我一度崩潰，好彩有媽咪嘅支持。

所以未決定請唔請陪月？邊度坐月？記得要考慮清楚邊樣會令自己最舒服，好慶幸茄蛋媽選擇返外家坐月，媽咪無微不至嘅照顧，令初為人母嘅茄蛋媽感動到偷偷喊咗好多次，世上只有媽媽好，銘記於心。

唔好睇少呢d產後症狀，如果你就快生，又睇到我今次嘅分享，至少有定心理準備，知道產後唔會咁爽皮，仲可以提早提下老公，減少摩擦，祝各位準媽媽生產順利，產後盡快恢復啦！大家加油。

參考資料：衛生處網頁