來自前世情人的父親節禮物

母女語錄。
我：「Keicy，Father’s day 就到喇，我哋送乜嘢畀 Daddy 呀？不如行街買啲嘢送畀 Daddy 好唔好呀？」

Keicy: 「唔好，我哋整啲嘢畀爸爸啦。」

我：「你想整乜嘢呀？」

Keicy 諗咗一陣之後話：「Daddy 鍾意飲咖啡，不如我哋整隻杯畀 Daddy 飲咖啡啦！」

我：「Good idea! 」

於是我哋一齊夾手夾腳 DIY 一隻獨一無二嘅杯，送畀 Daddy！

一直以嚟，社會都相當重視母親節，令父親節相比之下被忽略咗，不過我認為，爸爸同媽媽喺家庭裡面都係一樣咁重要，尤其是做咗三個小朋友嘅媽媽之後，更加覺得照顧仔女嘅重任，係須要爸爸媽媽一齊負起嘅，所以我都好隆重其事，花心思諗送乜嘢禮物畀 Daddy。

Keicy 話想喺杯上面畫畫，不過佢啲字寫得唔係好靚，咁所以我就決定，攞貼紙貼喺隻杯上面，再畀佢用顏色筆油，咁就唔怕啲字鬼畫符咁樣出晒界，唔知變咗咩。

小朋友鍾意貼貼紙，有得貼有得玩，Keicy 油得好開心！同時又可以認吓啲英文字，我仲唔駛坐定定喺佢旁邊看住，因為唔駛怕佢串錯字，所以我幫佢貼完啲貼紙之後就自己就行開一陣，由得 Keicy 一個自己慢慢油。

油完之後，摵咗啲貼紙，會有啲印喺度，咁就已經完成喇！

因為我係用咗一隻好特別嘅顏色筆，坊間有部分顏色筆係用嚟畫杯嘅，不過要焗，不過呢款筆唔駛，只係由得佢放喺度三日唔郁佢，再攞去洗就得，仲唔會甩色添！

Keicy 真係好有心思，畫完隻高身啲嘅杯之後，話要畫多一隻細啲嘅杯，同一隻用嚟放杯嘅碟，咁先至係一套喎！

Daddy 收到份禮物之後有咩反應？梗係開心到由心入面笑出嚟啦！話晒係 Keicy 呢個「前世情人」親手整畀佢家嘛！不過 Daddy 份人比較怕醜，唔畀我影相…… 不過唔緊要，我同 Keicy 永遠都會記得 Daddy 呢一刻甜到漏嘅笑容！嘻嘻！
謹祝大家父親節快樂！
FB: KeicyKK