可愛春夏花花裙

材料好簡單，只需鮮花、着舊咗嘅裙、同一把熱熔膠槍。

首先處理花材，將花同葉剪開，分顏色放好。

先揀大朵啲同靚啲嘅花黐上膊頭位先， 因為大人望小朋友係由上而下，第一眼會望膊頭位先。同一道理，膊頭位嘅葉同其他花材都要揀大塊啲嘅。

跟住將啲花同葉慢慢黐上胸位，次序同插花一樣，先黐大 size 嘅花材，再用細 size 嘅花材嚟填補空隙。

另外，用熱熔膠槍嘅時候真係要小心，唔係就會辣親手喇。

咁就做好又靚又得意嘅花花裙喇！着住去朋友婚禮做花女，啱晒！

On Keicy: 啲花花係 Keicy 同我一齊黐㗎！

On Kassy: 佢鍾意紫、紅色嘅花，所以遞咗好多畀我！

自製春夏花花裙 checklist:

1) 花：約一百朵，旺角花墟購買，約二百元。（兩條裙用量）

2) 裙：任何着舊咗嘅都得。

3) 熱熔膠槍：一把，雜貨店有售。

大家都試吓造條花花裙吖，係好好嘅親子活動嚟㗎！