唔怕BB百日哭~按摩舒緩好輕鬆~
NUNU頭三個月真係喊得好恐怖~
首先，我哋要知道，除咗笑之外，喊都係BB嘅語言。佢哋喊，即係話俾我哋知佢有需要。千祈唔好BB一喊就覺覺佢一定係曳曳扭計呀~
你會話咁點知佢喊咩呀?其實BB喊嘅原因總括嚟講有兩方面，佢哋就係同你講緊佢哋嘅生理需要或者心理需要。
我哋見BB喊，首先可以睇下BB係咪肚餓，濕片／有poopoo，有無太熱太凍? 又或者有肚風? 腹絞痛（colic) ?等等…..都唔係嘅就可以睇下係咪心理需要。
心理需要就可以觀察一下係咪環境令BB無安全感？BB想要爸爸媽媽抱？
以我經驗，通常爸媽有耐性慢慢以呢個方式諗，好快佢哋就會摸熟BB，佢哋一喊父母就會知佢哋喊咩。
當我哋知道BB因咩事喊之後，我哋就可以對症下藥幫佢止喊喇。
BB餓要餵奶、片濕有poopoo要換片、太凍著衫、太熱減衫，呢d唔駛我講各位聰明細心嘅父母一定識。
若然因為安全感同因為肚風同腸絞痛而哭鬧，‘那手唔成世‘嘅時候又可以點去處理呢?
首先，我哋理解下成因先~
BB喺我哋個咁舒服咁有安全感嘅肚裡面咁耐，出到嚟呢個世界對每一樣事物都要重新適應，例如空氣，呼吸嘅模式，聲音嘅衝擊，溫度等等，對BB嚟講都係陌生 嘅事，所有事都要重新靠自己去適應，所以因為無安全感而哭鬧係非常之正常。
另外，肚風同腹絞痛喺醫學上未有好確實嘅成因。傳統上，好多人話肚風係因為喊得多或者食奶吸咗風而引起。有人話埋身食人奶唔會有風，不過事實又關唔關事呢? 又或者我好似NuNu細個咁，有腹絞痛，又有臍疝，個肚成日唔舒服，成日喊咁點算呢?
細心睇會見到佢肚臍成個迷你月餅咁大粒…一喊就脹到好勁，好得人驚!
我今日想同你哋分享我同NuNu嘅舒緩方法，就係按摩喇。
首先，按摩可以同BB有親密嘅直接接觸，BB有爸爸媽媽溫暖雙手嘅撫觸安全感一定會增加。
第二，當按摩嘅時候，我地會釋放一種令我哋感到被愛嘅賀爾蒙‘催產素oxytocin ‘，催產素係可以令我哋感到放鬆同被愛，自然可以令BB同大人嘅情緒都好d啦~
第三， BB剛剛出世，媽咪又未坐完月，好多活動都未做得，不過按摩就可以隨時做，又唔洗大郁動，多按摩可以快d同BB培養到默契，快d知道Bb同你講咩。
莫生有時都會幫NUNU按摩
以下有按肚仔嘅手法可以俾大家參考一下：
1. 日月法
首先當BB個肚係時鐘，我哋嘅右手放喺大概10點鐘方向，然後順時針按到大概5點鐘位置。好似一個半月嘅形狀咁。然後，我哋嘅左手放喺大概5點鐘位置，順時針打圈按到5點位置為止。好似畫一個太陽嘅形狀咁。
雙手要同時進行，右手畫完一個半月，就可以提起放回10點位置。
可以重覆4-6次。
附上出自小妹手筆之解說~ 獻醜……
希望呢少少分享都可以幫到各位新手父母應急啦。 不過我都鼓勵各位想學按摩嘅新手父母，最好都係搵合資格嘅專業講師去學，因為有老師指導，先至可以確定自己嘅手法，力度係正確，按摩先會有效果同安全呀。
按摩小貼士：
好多人話最辛苦嘅時間就係頭三個月，又唔知佢喊咩，新手父母真係會覺得好難攪。其實BB一出世我哋就可以開始幫佢按摩，越早開始按摩，可以減低以上所講過嘅哭鬧情況。BB一出世就手忙腳亂，好多時都要4-5個月後先開始有時間，所以父母不妨喺大概況24周後，預先學識正確嘅按摩手法，就可以有兔樣法應付BB嘅需要，做好身心準備，迎接BB。
