大鄉理之初遊南丫島

又一件大鄉理表現，原來依家係中環碼頭搭去南丫島都真係唔洗半個鐘就到啦~

行出碼頭就感受到嗰一份清靜，整個環境都好輕鬆咁呀~

我地今日嘅行程就係由榕樹灣沿山路行上去南丫風釆發電站~

續下頁

坦白講….一向都幾懶懶做運動嘅我，一聽到「行山」依兩個字，唔多唔少都打左個突，仲曾經有一刻想唔參加。不過老公又極力鼓勵，又話沿途都只係平路行，都唔會太辛苦。

諗深一層…..輕輕鬆鬆去行下都唔錯呀，加上我同小小豬都未去過南丫島，同埋都想小小豬接觸多啲唔同嘅嘢，等佢多啲親親大自然，所以……C就C啦…..去行山啦！

其實只要由碼頭行都係一條路咁就可以行去風釆發電站，沿途都有路牌做指引，所以都好易搵呀~

老公真係冇呃我，沿路都係平路，仲會間中路經啲小店，可以借機又可以SHOP下~

雖然都有部分係斜路，不過都好易行，行得幾舒服呀，小小豬仲越行越快添~

續下頁

行到一半我地仲見到有間豆腐花店，當然去食返碗，順便休息下啦(我指我要休息呀)~

嘩…唔係賣廣告，豆腐花真係好滑身，而且唔洗點加黃糖都已經好好食，勁香豆味呀~

我地行左大約半個鐘多啲啲，終於去到我地嘅目的地，遠遠見到個大風車都好興奮啦~

近睇個大風車，真係好莊觀呀~

好在今日唔算太大風，天氣又幾好。我地可以舒舒服服咁坐係度大半個鐘望望風車吹下風(當然小小豬又嚟周圍跑啦)，感覺又真係幾寫意~

今日行程就好似簡簡單單，都係行上行落個山，食完午餐就走了。不過勝在我地舒舒服服，同埋……我地又完成一個創舉….順行完成「行山」啦！

雖然，今次都只係「行山」版嘅BB級，都唔係啲咩利害事。原來「行山」都唔係咁驚恐，行時係有啲辛苦，不過當你去到目的地時，嗰一份滿足感又真係難以形容。

經過今次我都覺「行山」原來幾好，舒舒服服又寫意，所以等天氣好啲時一定要搵地方去行下呀(當然……係去啲BB級地方啦….哈哈哈)！