名幼稚園一定可以升上名小學？

Aug 18 2018

有家長問我是否讀名幼稚園一定可以升上名小學，我說：「未必！」但家長答：「如果未必，點解咁多家長爭住替子女報名幼稚園呢？」其實我只答家長未必，不是答「不是」，家長反應已經那麼大，唯有請家長坐下來，詳細解釋「未必」的原因。

以下為我們討論的內容：

「趙」為本人　「家」為家長

家：每年都有數以百計的名幼稚園畢業生升入名小學，如果唔係名幼稚園的功勞，怎會有咁多人升上出名小學？

趙：我知道每年有很多名小學取錄咗名幼稚園的學生，但請你留意，果啲名小學的學生，唔係由幼稚園「升」上去的。至少，官立同津貼的學生，全部不是由某一間幼稚園直升上去的。因為香港官、津小一入學，規定要教育局「派」去的。而派的標準，一是「世襲」。即是父親在該小學做事或兄姊在該校就讀，二是「計分」，即是分數最高那些申請者便會被派中。三是抽籤，那是統一派位甲乙部派位的標準。三個派位標準都沒有話「小朋友幼稚園讀邊間」呢一樣，所以，你話讀名幼稚園點保證升上名小學呢？

家：講係咁講，但實際上，好多名幼稚園學生，都入到傳統名小學例如喇沙、瑪利諾、男女拔等，點解呢？

趙：有兩個原因，一個是名幼稚園人多勢眾，閒閒地一間有1000－2500人，而一般幼稚園只有300人左右，即是名幼與普通幼人數比率是3：1至8：1；亦即是如果普通幼稚園派到10個入名校，名幼稚園至少派到80個了，驟眼看來，名幼稚園便入多幾倍入名小學。

家：但名幼稚園與普通幼稚園入名小學的比率何止是8：1，我的觀察至少喺10：1甚至以上，點解會多咁多呢？

趙：簡單，因為絕大部分名小學的舊生爸爸都相信入到名幼稚園便升到上去名小學，每年都有不少喇沙舊生問我想讀喇小係唔係要讀果兩間名幼稚園，原來呢個名幼直入名小學的「謬論」，已根深蒂固，植根大部分爸媽的腦中。事實上，佢地嘅小朋友入到喇沙，不是幼稚園教得好，而是佢地小朋友分數夠高。因為「舊生分」＋「宗教分」＋適齡兒童已經有25分，是夠入名小學了，與數邊間幼稚園完全無關係也！

家：明白，但係直資私立收生有另一標準喎！

趙：冇錯，直資私立用面試收生，而面試會考中英文、數學、口才、常識、禮貌、社交，如果讀過某些名幼稚園而被名直資、私立小學取錄，就真係果啲名幼稚園的功勞。但我發覺名幼稚園大部分是私立獨立幼稚園，比免費幼稚園唯一分別是英文好啲，因幼稚園請多幾個外籍英文教師。只要家長想辦法教好孩子英文，便未必要讀果啲又難入又要收學費的私立獨家幼稚園了！

家：點樣教好孩子的英文呢？

趙：一.可以請個外籍英文人士教孩子會話，每週一至兩次；二.家長每晚臨睡前和孩子朗讀繪本或英文圖書，持之以恆，讓孩子養成讀出聲、聽得精的習慣，慢慢孩子便會喜愛閱讀。只要孩子自動喜愛閱讀，英文便會好起來了，那時什麼名校面試也難不倒他了！

家：多謝趙Sir指點迷津！