快靚正 3款 30分鐘煲起靚湯
編輯：Sunday Kiss
撰文：小小豬的成長日誌
圖片：小小豬的成長日誌
1.【簡易快靚正】 紫菜豆腐肉碎湯
豆腐含有豐富蛋白質，而且有益氣和中、生津潤燥、清熱解毒的功效。紫菜含碘量高，可降血壓及防止甲狀腺腫大。(網上資料)
材料：
紫菜1片、包仔豆腐一塊、肉碎約$15及薑兩小片~
做法：
薑洗乾淨然後拍鬆；豆腐切粒粒~
最後加入豆腐粒粒再待煲滾後，加少少鹽調味(加左豆腐之後唔好煲太耐，如果唔係啲豆腐就會好”鞋”啦)~
可以飲得啦~
又係一個既係餸又係湯嘅晚餐，咁就可以等我懶懶地之餘，又可以滿足一下要求高高嘅小小豬啦！
唔好以為依個紫菜豆腐肉碎湯，只係一個方便快捷嘅靚湯，佢仲好有營養，完全係快、靚、正靚湯，所以夏天都係煲多啲依簡單湯水啦！(大熱天……減少係廚房時間，人都舒服啲啲….哈哈哈)
2.紅菜頭雜菜湯 有助排清體內毒素
今次我就加埋左唔同嘅蔬菜一齊煲，就可以令雜菜湯含有豐富嘅纖維質和植物酵素，能幫助腸道蠕動，排清體內毒素和宿便，改善腸道健康。
材料：
新鮮紅菜頭1個(如果平時係街市冇大紅菜頭，就可以用兩個小型代替)、番茄2個、 蘋果2個、粟米1條、西芹1扎及薑幾片~
做法：
先將紅菜頭洗淨，然後去皮及切片。佢嘅莖葉都好有用，所以洗淨切段後加埋入去一齊煲呀~
蘋果洗淨後切件；西芹洗淨切段~
粟米及番茄洗淨後切件；薑片去皮之後拍鬆~
煲內放約3L水，然後隨水加入薑片。我個人覺得加多幾片薑會更加好飲，不過因為要就小小豬關係，我只係加左五小片~
用大火將水煲滾後，將其餘材料加入煲內~
待水再滾後用大火加蓋煲約15分鐘~
之後轉慢火加蓋煲多50分鐘~
最後加少少鹽調味，之後就飲得啦~
煲過咁多次紅菜頭湯，依款可以話係最好飲嘅(當然之前嗰啲都好好飲)，因為飲落真係有啲似羅宋湯，有好甜嘅紅菜頭之餘，又有好香嘅西芹味，所以話咁快就成煲KO晒，超有滿足感呢！
3.營養靚湯 番茄豆腐豬肉碎蛋花湯
豆腐、番茄、豬肉碎及雞蛋都係一啲好有營養嘅食物素，絕對適合大小朋友呀！
材料
番茄三個、硬豆腐一磚、雞蛋2隻、免治豬肉約$15
做法：
先用1/2茶匙鹽及少少胡椒粉將免治豬肉醃最少30分鐘~
將二個番茄切成番茄蓉，另一個就切塊；硬豆腐就切成粒粒~
煲內加入約1.5L水，待水煮沸後加入免治豬肉滾5分鐘~
然後再放入番茄蓉及豆腐煲10分鐘~
最後加入番茄塊及少少鹽調味後，再多煲5分鐘~
煲好後熄火，加入蛋漿拌勻~
成個過程唔洗半個鐘(唔計醃肉時間)，就有一個湯飲啦~
又一個好飲有益兼可以當餸嘅一個菜，真係啱晒我呀~
