新花樣 三棗 茶 紓緩氣管敏感

早幾日見有朋友仔教話可以加埋蘋果及雪梨一齊煲，個顏色靚啲之餘(即係冇咁黑卒卒)，味道可以更加清甜，所以我又嚟試下依個蘋果雪梨 三棗 茶啦！

編輯：sunday kiss

三棗 茶有咩好？

原來將紅棗、南棗同埋蜜棗 三棗 一齊煲，除左對補氣血更有效用之外，因為棗類都有抗過敏作用，所以對氣管敏感而引致容易咳嗽都會有調理作用。補益得來又唔會太燥火，所以對好啱小朋友飲用。

今次加埋蘋果同雪梨，除左味道更加甜之外，仲非常滋潤，可以有滋陰潤燥之作用，所以就更加啱小朋友依家嘅轉季時飲用呀！

材料超簡單，只需要蘋果3個、雪梨4個、雪梨乾3-4片、蜜棗5粒、雞心紅棗10粒及藍棗5粒~

雪梨乾、蜜棗、紅棗及藍棗浸洗一陣，紅棗去核洗淨~

新鮮雪梨就算去清晒啲芯都一定係有少少酸，依個就係新鮮雪梨特性，所以就要加幾片雪梨乾就可以中和返那一陣微酸味(我試過幾次又真係WORK呀)！

蘋果及雪梨去芯切塊洗淨~

煲內放3L水，然後加入所有材料~

待煲滾後，用大火加蓋煲約15分鐘~

再轉小火加蓋煲多45分鐘~

係煲緊嘅時候，可以將 三棗 壓一壓，咁就可以出味啲~

最後再焗15分鐘，隔渣後就可以飲得啦~

絕對唔係講笑，依個蘋果雪梨 三棗 茶絕對係我煲過咁多涼茶最好飲嘅，真係強力推介俾大家。小小豬不知幾鐘意飲，一杯接一杯咁快快口飲，仲邊飲邊話好好味。另外，當我倒俾老公飲時，竟然話唔似係我自己煲，話仲好飲過坊街買嗰啲….哈哈哈！

睇見佢地兩父子飲得咁開心，真係勁有滿足感，所以話呢….我煮嘢嘅力量都係來自佢地呀！

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！

BY 小小豬的成長日誌