暑假必玩 ！將軍澳 區4大親子好去處 @ Parent婷

踏入7月，學生們陸續放暑假，家長們都開始面對同一煩惱，就係唔想屋企小朋友日日留喺屋企咁悶，但係要帶小朋友搭車搭船出遠門玩又怕麻煩，點算好？其實去玩唔一定要遠嘅，近近哋沿住地鐵路線都已經好多嘢玩啦。今日就帶大家嚟到 將軍澳 區，以下景點一定啱晒一家大細啦！

1. 親親郊外 清水灣灣畔徑

想帶小朋友戶外活動？唔一定要去好遠嘅！由將軍澳地鐵站出發，步行10分鐘左右就可以嚟到清水灣灣畔徑。雖然風景稱不上是青山綠水，但帶住小朋友嚟散散步吹吹風，的確幾寫意㗎~

2.青青草原 將軍澳單車館公園

對於大人嚟講，每個公園都好似一模一樣。但對於小朋友而言，偶爾去一個未去過嘅公園，其實已經萬分開心。將軍澳單車館公園除咗有唔同類型嘅遊樂設施外，門外仲有一大片草地俾小朋友跑跑跳跳，玩捉迷藏又得！玩玩飛碟亦得！小朋友隨時玩足半日都唔厭㗎！

3. 全港最大 兒童遊戲室

小朋友怕熱唔鍾意喺戶外走嚟走去？將軍澳單車館公園嘅兒童遊戲室實啱晒佢！遊戲室全時間提供空調，地上及牆壁均鋪着軟墊，小朋友可以無拘無束安全咁玩，咁就小朋友玩得開心，家長又放心啦！不過各位家長要留意，遊戲室每45分至1小時30分為一節，中間設有清潔時間，各位家長要留意喇！

4. 消閒Shopping歎歎茶 將軍澳廣場

如果唔想小朋友周圍走身水身汗，又熱又曬又多蚊，嚟將軍澳廣場或者會適合你。場內除咗有各類商店，衫、褲、鞋俾你同小朋友Shopping外，仲可以同小朋友悠悠閒閒食個下午茶，其實幾開心㗎！

而家至 3/8喺將軍澳廣場1樓中庭仲有BIKEAHOLIC單車POP UP STORE同Columbia Pop-up Store，多款戶外、單車及單車裝備都可以喺度買到，記得唔好錯過啊！

限定BIKEAHOLIC Pop-up Store

日期︰由即日起至8月3日

地點︰將軍澳廣場1樓B區

限定Columbia Pop-up Store

日期︰由即日起至8月3日

地點︰將軍澳廣場1樓A區