書~全部都係書~ 油麻地 童書店
我以前買過一本書俾親戚嘅小朋友做生日禮物，本書係講唔同動物嘅大便嘅~ 非常生活化，又有趣，不過售賣地點係一d賣外國書藉同玩具嘅地方，價錢無咁大眾化。而一般本地嘅書店d書係平d,但係又未必搵到我喜歡嘅書。
所以今年書展，我都帶咗nunu同藍藍表姐一齊去行下。發現而家真係好多幼兒化學習嘅教材書賣。（可能一路都好多嘅，係我之前好少行書展啫…）不過我喜歡嘅類形其實又唔係好多。 我揹一個拖一個穿穿插插，行嚟行去，行到藍藍表姐都唔想行。
跟住我醒起大莫生嘅大學同學有喺其中一個booth度擺，跟住我就用好興奮嘅mode同藍藍講，阿姨帶你去坐低睇書書囉，佢一聽到話坐低，即刻同我開turbo離開兒童書嘅展區，往1B展區進發。
我要去嘅就係生命工場攤位喇~終於到喇~ 見到嗲嗲嘅朋友，梗係快快手俾Nunu佢抱下先啦~
其實今年6月我都有去到Fifi主講嘅兒童繪本分享會，佢介紹嘅書都好有意思，內容好生活化而且好能夠反映到真實社會會出現嘅情況。現實中，不論大人小朋友都 會有機會遇到唔同嘅情況，分享會中fifi介紹嘅其中一本書係叫河馬波波屁股大~ 一睇個名我就好鍾意~~本書係講波波佢覺得好唔開心，因為覺得自己個pat pat好大，其他動物都對佢個pat pat議論紛紛，有d話佢pat pat大，有d話佢pat pat細，最後仲大打出手添，最後究竟河馬波波點睇自己個pat pat呢？其他動物又點收科呢個? 內容大概講到呢度。覺得我講唔有趣就啱喇~自己去買本嚟睇下呀~
其實書裏面嘅情況，喺現實中都好常見。換一換內容，現實發生嘅可以係靚與唔靚／肥或瘦／高或矮／叻唔叻等等……小朋友成長中好多時都會變做河馬波 波，會好介意別人對自己嘅睇法又或者對別人或其他事物都會有自己嘅一套，到底有無標準呢?點定呢?你嘅標準同我個標準一唔一樣呢?你啱定我啱呢?
睇呢d書除咗教導小朋友，其實作為家長睇亦都係一種反思。（好多時人大咗就會識話人唔識話自己）
書展過咗你哋都可以去佢哋門市參觀下~ 佢哋所賣嘅書非常貼地~~
1Up
油麻地 咸美頓街 20號 地下及閣樓
星期二 至 星期日 中午12:00-晚上10:00
星期一 及 公眾假期 休息
1Up有好多生命教育嘅書，例如尊重差異/情緒學習/朋輩相處/母乳媽媽/入學準備/貓B共融/愛護動物/攪笑系列等……仲有好多好多，如果你都喜歡呢一類嘅書，去到一定會有收獲！藍藍表姐自己睇書都睇得好開心添~
外面好少見到有關餵哺母乳嘅書，如果屋企有小朋友，好適合同小朋友一齊睇，特別如果屋企BB出世，媽媽可以同哥哥姐姐一齊睇，去解釋俾佢哋知，媽媽點餵母乳，等BB出世時減少呷醋機會添~
大家有興趣就去睇下啦~~
親子按摩小TIP：
按摩同讀書一樣，父母不妨聆聽小朋友需要，尊重佢哋嘅意願，唔好強迫佢哋按摩呀。因為迫得就會好似俾人迫讀書一樣咁抗拒ga~~
