桂花酒釀啫喱

其實我都係一次冇意中見到有網站嘅介紹，佢話雖然啫喱係凍甜品，不過加左桂花同酒釀一齊食，就會變成養生甜品。

因為酒釀可以生津活血及利水消腫，而由於酒釀含少量酒精，所以亦可促進血液循環及促進消化的功能。而桂花糖就有生津潤肺及滋陰作用，所以雖然係凍食，但都係好啱秋冬天氣食呀！

材料包括有：桂花糖一湯匙、酒釀半湯匙、荔枝味啫喱粉一盒及杞子約十粒~

其實咁多材料最難買都可以話係酒釀，因為我都真係搵左好一段時間先俾我係一暑間細細嘅雜貨店先買到。好在唔算貴，依一盒都只係$15。不過攪笑嘅小小豬問：『點解拎啲粥嚟做甜品？』。哈哈哈…咁又真係幾似哦~

首先用熱水浸軟啲杞子備用~

然後倒入荔枝味啫喱粉， 再加入220ML熱水慢慢攪拌~

最後分別加入桂花糖、酒釀及杞子~

攪拌好後就可以倒入模具內~

可以放入雪櫃冷藏至啫喱凝固~

由於啲桂花、酒釀及杞子都係會沉底，整出嚟就冇咁靚，所以就可以係啲啫喱開始凝固時，用筷子攪拌一下，咁就可以雪到整杯材料都好平均啦~

今次啲啫喱就雪左差唔多兩個鐘就凝固，所以我唔等小小豬就先食一杯先啦~

食用效果又真係唔可以係第一次食嘅時候感覺到，不過桂花糖同荔枝啫喱估唔到又幾夾哦，加上淡淡嘅酒釀味，都唔錯呀~

不過一向唔”好”甜嘅我就覺得甜左少少，我想減多少少桂花糖嘅份量應該會好好多。

由於都唔算好重酒味，同埋我食左都冇乜不良反應，所以我都有俾小小豬食，話晒都係佢整，都要俾佢自己食下佢嘅製成品嘛。食左幾啖之後，小小豬話麻麻地好味，所以就只係食左半杯。不過估佢唔到竟然鐘意食入面啲杞子，仲連我嗰杯內嘅杞子都食埋呀(平時煲湯又唔見佢肯食，真係唔知好嬲定好笑呀)~

其實依個我都係打算整俾自己食，所以小小豬唔食都冇所謂，就等我食埋佢，補補佢啦！(唉…嗰頭話減肥…依頭又肥多兩磅啦)

依家有齊材料，等我搵日再整桂花酒釀丸子先得，唔知熱食個味道係點呢？

温馨提示：由於桂花屬性都帶一點寒涼，所以大家係整之前，都要留意一下自己體質先啦！