清塵蟎神器

Aug 16 2016

老公每朝鼻涕長流既問題咁多年都無乜處理，雖然到晏晝就無事，但一諗起bb出世後或因屋企環境因素而引起鼻敏感或濕疹，加上之前喺幾個媽媽會講座中，了解到塵蟎係致敏源之一，促使茄蛋媽四圍搵解決方法消滅塵蟎。原本想買Dyson，但價錢應付唔嚟，有日無意間發現呢部而家日本好興嘅「清塵蟎神器」IRIS OHYAMA 除蟎吸塵機，價錢經濟，立即買返嚟試試佢！

簡單介紹下清塵蟎神器部機包咗乜啦，首先有主機一個（白色/啡色/粉紅色）、火牛連充電線（唔包括轉插）、一嚿電、一個塵網，盛惠HK$980（門市自取價，如寄到府上郵費另計）。茄蛋媽係透過Facebook 搵代購公司買嘅，如須進一步資料請PM我比資料你啦。充電方面，一般旅行轉插已經可以用到，只要有日本兩腳果隻轉換都得喇，第一次用之前充電大半日備電就得。

用法好簡單，開著後對住床鋪碌碌下就得，重點係要留意機身上面嘅燈號，分別係紅、黃，綠燈，唔同燈號代表塵蟎多少，紅燈代表碌過嘅位置有好多塵蟎，黃燈無咁嚴重，綠色就代表乾淨喇。

用後感（5*最滿意）
嘈音****
吸力**
操作*****
效果****

本身好怕吸塵機好嘈，但佢嘅聲量都可以接受，唔算太嘈，而且我只係用嚟吸床鋪枕頭，幾野就K.O.，唔需要太長時間。吸力方面得2星，係因為佢只限於吸塵、塵蟎、細小毛髮，大件少少嘅碎屑都吸唔到，似乎呢部機嘅性能設計專for肉眼睇唔到嘅蟎蟲，呢點有代考證。操作方面滿分，對於機械白痴嘅茄蛋媽嚟講，一插即用係必須的，太高科技又要安裝好多配件嘅話，只會令人用完一次就唔會再用。