澳門喜來登之旅

首先，要非常讚酒店既細心，知道我地結婚周年紀念，所以一早幫我地係張床鋪好晒靚靚玫瑰花寫Happy Anniversary!真係好驚喜呢！然後入到小朋友房，就有Yougo Igo既字樣歡迎我地，還有兩套功夫熊貓既禮物，同埋全房都有彩色波波，真係五星級既接待，好感動呢！

由於我地去到岩岩午餐時間，所以我地就係房間來個room service ，因為我同強哥趕住有下一站既節目，哈哈！唔好以為room service 只係得普通既漢堡包三文治，喜來登酒店既room service 真係好周到，連龍蝦鮑魚都有，極豪華有派頭呢！安坐房間都可以有一流美食！謹姐就享受佢既kids menu ，大讚！

好啦！戲肉黎啦！今次其實想黎慶祝我地結婚周年的，所以酒店安排左我地去佢地既shine spa試下佢地既couple spa，嘩！嘩！嘩！真係舒適到不得了，我自問都試好多美容院既massage treatment ，但呢度既真係我去過數一數二，可能又因爲可以同老公一齊enjoy就更加覺得正啦！先黎一個body磨沙treatment，按摩師用海泥幫我地全身按摩磨沙，之後就去臨個浴就再黎90分鐘的全身推油按摩，同強哥一齊好好享受呢個couple massage ，最後再落去一個按摩池度一邊飲香檳一邊食住口朱古力嘆按摩池，實在人生一大享受！

呢短短兩小時，真係難忘啦！我地會好好記住，希望係不久既將來可以再試多次呢個咁正既spa !

之後會合公公婆婆同兩位小朋友就直奔去巴黎人睇The Thriller Show，呢個騷大唱MJ既經典金曲，又跳又唱，好熱鬧，引證左好既音樂真係無分年齡語言年代，謹姐睇得超投入，當然我地每個人都好享受咁好聽既歌同派對啦！

睇完騷再返去喜來登酒店晚餐，今晚黎到Bene班妮意大利餐廳試試佢地既新menu，頭盤黎個永遠都係最受歡迎既超級海鮮拼盆，生蠔、長腳蟹、海蝦、青口咩都齊，好新鮮，震撼的size啊！之後試了他們的酥炸墨魚配墨汁燴飯，味道濃郁香口，大人鐘意，小朋友都好岩食！而佢地最出名既香濃芝士煙肉意大利粉就必定是強哥最愛，他們會於客人面前把整個芝士輪拿出為我們準備這道菜，「真.芝士」啊！

而去到第二天，我地先去到Feast 盛宴食自助早餐，其實我係好重視酒店的自助早餐質素的，因為好多酒店都好花好多心力於晚餐上而忽視早餐，其實好多人跟我一樣外出旅遊往往好期待個自助早餐，一間酒店是否做到細心有心其實係早餐度都可以睇到唔少野！我夠膽講Feast係我食過既自助早餐頭三甲， 選擇多而且食物好周到照顧唔同國家的遊客，特別喜歡他們的包點選擇，色彩繽紛的冬甩又有，即做新鮮窩夫亦有，大量水果、粉麵、點心、咖哩…. 非常豐富！

早餐之後我地立即返房間換上泳衣準備去巴黎人的Qube Kingdom和Aqua World，Qube Kingdom好岩小朋友黎玩，室內超大遊樂場，設施一流，係我細個時夢寐以求既遊樂場，室外仲有個充氣城堡，只係天氣較熱，我地主要stay indoor，而Aqua World 就係我地香港最缺乏既水上樂園，三大個遊樂場size和設備既泳池，小朋友玩得超開心，亦有個幾層樓高既水上滑梯，非常刺激！公公和強哥都話好好玩，但因為我唔識游水就無得玩啦，嗚嗚！

玩完一輪，最後去到Planet J冒險王國，呢個充滿科技遊戲於一身既遊樂場看看，由於謹姐仲細未識玩，但強哥已經被吸引左啦，因為佢其實內心深處係好鐘意打機架，哈哈！

最後，我地去到Xin 鮮食我們的火鍋午餐，鮮的火鍋湯底最吸引，有七個選擇，要辣又有要鮮味又有，小朋友用清湯亦無問題，最鐘意佢地既鮮鯇魚，好脆口，火鍋配料選擇多，一家大細都食得好開心呢！

呢個澳門之旅，我地一家比夠101分！yeah!