澳門親子尋找魔術之旅
就嚟放聖誕假，做學生嘅可以輕鬆下。不過有小朋友嘅都知道，仔女得閒嘅時候，即係你好唔得閒嘅日子，要抽時間陪佢哋嘛！OK！我一向都buy親子關係要培養嘅！早排就同對仔女過咗澳門「魔幻間」玩！唔錯，值得同大家推介！
「老少咸宜魔幻show」
「魔幻間」同「水舞間」來自同一集團，「水舞間」口碑唔錯，果然「魔幻間」都相當好睇，入面嘅show老少咸宜，我老公一向都鍾意睇魔術表演嘅，但真係估唔到對仔女睇得仲興奮過佢！而我，當然相當滿意啦！一張飛睇足90分鐘3個劇院4個魔術師表演，師奶本色淨係「抵」已經好吸引我！
「可以體驗嘅magic」
個show 好特別，唔係淨係睇魔術表演，仲有得體驗！好似入場咁，我哋需要半摸黑咁通過一條四面圍鏡嘅「時光隧道」。行到一半突然有個影像會彈出來同你講下嘢，後尾先知道係呢個「魔幻間」嘅設計師。成個氣氛有啲似探險，同神秘嘅魔術好夾。
周圍都係鏡，我哋成家大手拖小手咁撞咗幾下先過到條通道，過程相當好笑。
「法寶廳」X close up magic
喺「法寶廳」等入第一個劇院期間，已經有魔術師同我哋玩下close up magic 。阿仔走嚟走去都有發現，就係入面嘅擺設，好似呢幅畫咁係會跟住個人郁。
對仔女對住幅畫來回行咗十幾次都有，不過都好高興佢哋咁有好奇心。
「古堡劇院」&「魅戲劇院」
之後觀眾被分成一半輪流入唔同劇院，我哋先入由一對鬼馬夫婦表演嘅「古堡劇院」，然後入靚仔魔術師嘅「魅戲劇院」。聽講劇院嘅魔術師會轉下人玩唔同魔術，仔女知道已經話要嚟多幾次。
現場仲有啲無咁heavy嘅笑位，好似呢幕美女換衫換出個肥仔咁，笑死！
完場後去出口嘅 「魔幻禮品店」，再買番一兩件魔術道具俾對仔女玩！我呢個阿媽又功德圓滿喇！放假不妨帶仔女，同自己去見識下！
魔幻間
地址：澳門新濠影滙２樓
免付費電話： 800 900 783
