坐耐少少車就得啦! ^^
呢次我同 3 姊弟去咗屯門海邊一間酒店過一晚, 因為有好多活動玩! 嘻嘻!
只要跟住尋寶地圖, 搵出酒店唔同角落嘅寶藏, 就有禮物喇!
`
Keicy、Kassy 同 Par Par 一入房, 就對住個大窗嘩嘩聲!
3 姊弟即刻除鞋, 書包未放, 就衝埋去個窗度大叫: 「好大個海呀!」、「好多船呀! 」、「好靚呀! 」 叫咗好耐先靜落嚟慢慢睇.
`
房間設計好有心思.
中央有度暗門間開兩間房, 一間係畀小朋友瞓, 有兩張床.
而另一間房就有張雙人床.
喺日抖, 我會打開暗門, 畀所有人兩邊走.
夜晚就閂埋, 令大家有少少私隱.
咁大人睇電視睇夜咗, 都唔會嘈住小朋友啦!
`
水上單車、海盜船及金銀島兩大主題滑水梯、水槍大戰，同各項噴水裝置, 3 姊弟都玩到癲咗!
水戰完, 玩到慶合合, 最啱就係用酒店派嘅雪糕劵嚟換雪糕食, 仲有要H字頭嗰隻呀!!!
大家都食得勁開心! ^^
`
玩到挨晚, 上房休息一陣, 換件衫, 就去食自助餐!
奧運主辦國巴西主題嘅 buffet 係戶外燒烤為主, 勁香!
好大條魚, 係咁燒!
聞倒都流晒口水喇!
其他葡國菜都好好食，例如特色冷盤檸檬辣椒魷魚同焗三文魚粒.
Live band 增加氣氛, 真係好似去咗外國度假咁樣!
`
食完飯, 緊接睇魔術表演, 魔術師全程 45 分鐘落力演出, 同大家打成一片!
`
放晒電, 就上酒店沖涼, 3 姊弟 9 秒 9 就瞓着咗……
`
第二朝……
自助早餐好好食.
小朋友最鍾意自己攞嘢食, 鍾意揀乜就食乜.
平時可能唔會食好多菜, 但係因為自己攞, 夾得好興奮, 所以夾好多, 又食晒, 真係好!
`
同「至kids樂園」玩波波池、大嚿Lego 約一個鐘頭，就完咗呢個兩日一夜嘅「放電之旅」.
`
一家人齊齊整整, 其實去邊度旅行都一樣咁開心, 不過呢間酒店嘅大堂同泳池真係幾靚, 而家啲房又新裝修晒, 整得好靚好乾淨.
