脆卜卜…年糕春卷

煎年糕其實我都驚驚地，因為我啲煎功又真係幾差，勁勁勁勁易煎燶。

不過依個整法真係勁簡單，只需要依三樣材料就可以整到零失敗嘅年糕春卷~

首先將年糕切成長方型~

然後準備已解凍嘅春卷皮~

塗一層蛋汁係春卷皮上面~

下頁：包春卷

之後就好似普通皮春卷方法包住塊年糕，包嘅時候要小心，唔可以包得太實，否則光波嘅時候就會令皮破裂，咁軟身嘅年糕就會流出嚟啦~

最後再用蛋汁封口~

如果打算煎的話，就可以拎去煎至金黃色。但我準備用光波爐焗，所以就要噴少少油~

放入光波爐用250度光波5分鐘，之後再反轉另一面，相同地用250度光波5分鐘~

外脆內軟嘅年糕春卷可以食得啦~

唔怪之得話係零失敗，出爐個樣都幾靚呀。味道又都唔講得笑，脆卜卜嘅皮包住軟淋淋嘅年糕，真係堅好食~

再加上我又用光波爐嚟焗，只係用左少少油，少左嗰一份油膩，仲唔係食得好健康之餘，又可以滿足為食嘅我！