英國餓底之路 — 英國搵食。慢活的開始 (UKUC英國生活)
廣告
嚟咗英國生活幾年，關於香港好多記憶都依然經常出現喺我腦海。我做唔到一去到呢度就立即變成英國人咁，好似除咗法例、交通規則、林林總總嘅稅、醫療及福利制度等要一一研究了解之外，更多嘅係生活上嘅嘢要了解、學習同適應。
HK vs UK，的確係有一些文化差異存在。可能自細睇廣告大，「xxxx，融入家中」呢樣嘢好緊要。試諗吓，如果係香港嘅新移民，可以尊重佢打算長久居住嘅新地方的生活方式同差異，我並非話要完全改變自己，但起碼可以用「中西合璧」呢招去拆，用自己嘅功力去試試取兩者之長，捨兩者之短。雖然香港有其唔好嘅地方，但我又唔覺英國所有嘢都係好。
英國生活慢 香港太急促
例如生活節奏，我喺香港覺得可以慢啲就好囉，可能我份工時間長啦，一日24小時好似都唔夠用。嚟到呢度開始好唔習慣佢哋咁慢，樣樣嘢都好似你急我唔急，但而家又發覺習慣咗。記得舊年返香港探親，當然不忘買番啲嘢畀自己同屋企人啦，點知買親嘢都成日被人催「借借呀」、「俾完錢行埋一邊畀下一個啦」！喺呢度唔催人好似係一種文化，揸車好少會響個不停要行人或車行快啲，就連喺cafe或餐廳食嘢，成個流程都好慢好慢……
英國食餐飯要3個鐘
首先講吓去食晚餐，如果你選一些非快餐類食肆，遇上假期忙分分鐘3個鐘先埋到單走。
1）侍應會先問你飲咩，所以坐低係揀要飲咩先（唔係HK睇食咩先）。
2）之後先睇個menu想食咩，請耐心等待侍應見到你嘅眼神想落order 佢會示意轉頭嚟（唔似喺香港咁催人嚟，佢哋最憎做緊一樣嘢未完你就中途插入，覺得你好冇禮貌）。
3）飲住嘢等個廚慢煮好個starter。
4）等你完咗個starter侍應收走，再準備你個main course 。
5）等你食完個main course侍應收走會問你要唔要甜品（如果要就到「6」，唔要就到「7」）。
6）等你食完個甜品，走得就埋單，想傾就繼續吧⋯⋯
7）等侍應同你有眼神接觸就可示意埋單
8）等埋單
其實仲有好多，唔一次講咁多住，而家有任務要做。再講。
