荔園返嚟喇！

而我今日就係同 Kassy 去過二人世界，因為姐姐 Keicy 要返學，小朋友應該以學業為重吖嘛！

而我自己就未出發先興奮，因為細細個就跟屋企人去玩過，所以係我同好多香港人嘅童年回憶！
我今日係揸車去，泊喺 IFC，行幾步過去就到喇！
一去到就見到好大個地圖，我哋當然企埋去睇吓玩啲咩先啦！

主辦單位好細心，每一位入場人士都有一把圓型嘅扇仔，除咗可以潑涼，上高仲有地圖，畀我哋搵地方玩，玩到個人 high 晒都唔怕會盪失路啦！不過我唔記得同把扇影相，嘻嘻！

我哋第一樣玩嘅係掟香蕉，Kassy 初初有啲驚，以為隻大笨象係真嘅，哈哈！傻豬嚟嘅！後尾就玩得好開心，因為佢細粒啲，所以要抱住佢先掟倒。
我當然有一齊掟啦，仲成功餵到呢隻「A貨 Tino」食「A貨香蕉」！佢食完之後仲會去便便，不過唔臭嘅，好搞笑！

跟住仲見到好多熟悉嘅卡通人物，其中一個係小露寶，仲有好多隻添！唔止我呢位媽媽，在場好多媽媽都仲開心過啲小朋友，因為啲仔女都唔知道係乜……

行得咁上下又有冰室可以坐低食吓嘢、飲吓嘢同休息吓，喺幾個食肆當中，我最鍾意嘅係小忌廉餐廳，因為小忌廉係我嘅最愛，嗰度啲嘢飲仲好有日式風味！

我一見到小忌廉就即刻諗起佢首主題曲，原來除咗有佢嘅主題食店，仲有得買佢嘅公仔同禮物，咁當然我有玩埋佢個攤位遊戲「我係小忌廉」，掟出星星木碟去洞口啦！

Kassy 都好中意小忌廉，因為佢超鍾意紫色，小忌廉咁啱係紫色頭髮，Kassy 一見倒就大叫：「Purple hair，好靚呀！」

可能係小忌廉畀力量Kassy，佢玩掟圈圈嗰陣掟中咗一個，好叻叻呀！

我哋跟住去玩旋轉木馬、好刺激嘅鬼馬飛天橋、鬼屋、溜冰場、恐龍屋瀡滑梯，不過估唔到 Kassy 會玩「足球小將過3關」，呢個 game 好啱小朋友玩，佢總共有 6次射波機會，要射去指定方格或者成一直線，有啲踢開波嘅男仔，一踢就中，攞到禮物。

另一個要出好多力嘅 game 係青蛙跳，愈大力將個鎚扑落去，隻青蛙就跳得愈遠，我同 Kassy 都唔夠大力，所以有強勁臂彎嘅大人玩會着數啲！

郁動完一輪就去坐船仔，Kassy 一去到門口即刻 fing 開我隻手，好開心噉衝上去船度玩 ，小朋友果然一有得玩就會有無限精力。

而喺最後尾玩嘅掟階磚， Kassy 贏咗兩排香口膠，佢好開心，好滿足咁望住啲香口膠，走嗰陣時我話幫佢代住先，但都唔肯放手，攞住自己掟中嘅獎品返屋企。

後記：去荔園做足準備

今日天氣好熱，當然要帶今期最興嘅迷你流動風扇啦！

另外我有帶我嘅 ” ice towel “，呢個名係我改嘅，因為條毛巾好特別，濕水後可以 keep 住冰涼兩個鐘頭，可以打橫圍喺條頸度，或者放喺額頭度消暑同抹吓面，好涼快，即刻降溫，而喺熱返之後，濕水就即刻再凍返。
咁方便又好用，係我呢個夏天嘅最愛！^^

FB: KeicyKK