【親子好去處】加利布尼市集＋投影盛演同Pixar水花大街派對

今日連個天都鍾意我哋，俾咗個超熱的天氣陪我哋去玩！本來以為星期三唔多人，點知原來暑假真係日日都係星期日。

今年「迪士尼巨星嘉年華 大玩水花」講到明就係玩水啦！不過另外一個亮點就係同今個暑假最Hit的超人特工隊2的超能家族打咭。

所以一入到樂園第一件事就係好似小聰咁衝入去『明日世界』搵超能家族。

雖然人未到，但係得個佈景都已經急住要走埋去打住咭先。

《超人特工隊》超能駕到！

話口未完，超能先生同彈弓女俠出場啦，同埋一樣咁多人鍾意嘅冰條俠都一齊嚟。

話佢哋係粒粒巨星係無錯，因為真係要望住個時間表去排隊，先至可以同到佢哋影相。

拎住迪士尼樂園個APP就可以睇到每一個節目的時間表，我哋同超能家族Say拜拜後，就去到『探險世界』的『樂韻叢林』。

因為要準備去見另一個巨星。

準備要入去睇『魔海奇緣凱旋慶典』，點知俾我哋喺外面撞到慕安娜，梗係要即刻捉住佢打咭集郵啦！(BTW仲好靚女㖭)

兩個一陣間要打呢個非洲鼓，同慕安娜打打氣。

成個Show長20分鐘，睇完Show就直接去埋『加利布尼巿集』。

巿集裡面有6個攤位遊戲，玩一次要$50，但係一次過買5張飛就會送多1張。可能好多人都同我一樣，覺得$50先玩得一次咁貴，每掉一個波就好似掉咗幾廿蚊落海咁。(有下文)

不過出得嚟玩，預咗要還！我見到佢三獎D襟章咁靚，同埋本住入得嚟玩就唔好慳個一百幾十(總係有把聲喺耳仔邊咁講)，於是就快快走去買飛等自己冇得後悔。

雖然係咁…但係原來未出發先興奮，我哋課金咗買6張遊戲飛後，姐姐就叫我哋可以喺度揀6張Postcard。

好靚囉！都仲未完…

嗱！你見到個仔咁開心咁拎住隻公仔大聲嗌你，係咪唔捨得…好難忍到手唔俾錢去玩。(但係我想講中到大獎先有囉！)

拎住D飛，跟住就要諗下玩邊個遊戲喇。

最吸睛又感覺上最易玩的，就係呢個『奇趣咚咚樂』，只要將個波掉入去樽度就有獎。

只要掉中最高個黃色樽就即刻有大獎啦！

但係少年真係太年輕了，因為個波係輕到冇人有，所以原來係超難中！

結果全部唔中，不過當我哋以為咩都冇嘅時侯，居然姐姐叫我哋揀一隻tsum tsum公仔，原來咩都唔中都有安慰獎，即係永不落空啦！哥哥同呀芊都超開心 (其實只係我哋唔留心睇T&C)

之後我哋都冇咩希望咁，近近地揀隔離個遊戲繼續燒飛。今次哥哥問得清清楚楚，等自己輸都輸得明白。

總共有3次機會，有2次送到個木球入洞就可以中大獎。

對哥哥嚟講當然仲係有一定難度，結果3次機會都跌咗個波落去。(大家明唔明望住個仔係咁輸，但又好想出手，同時又知道應該要俾佢嘗試嗰種矛盾感覺)

但係我有D唔係好甘心，覺得好似唔係好難咁，跟住就用多張飛自己玩多次。(亮點係呀芊都好緊張，因為佢好鍾意隻小飛象。)

我一球得一球唔得，得番最後一次機會，好在都俾我送到入去，中到大獎，真係個心都跌咗出嚟。(亮點係呀芊已經第一時間睄住隻小飛象)

好在不負眾望，如果唔係就成為千古罪人。(所以大家記住呢個係其中一個易玩的Game)

之後佢哋開始醒目啦，就係去睇吓邊個大獎鍾意先至去玩嗰個Game。

『加利布尼幸運輪』就可以揀3個圖案，然後轉幸運輪4次，要中哂3個圖案先有大獎。

完全靠運氣的遊戲，都俾哥哥中到個二獎小鹿斑比公仔。

遊戲嚟到呢個階段，我哋手上仲有2張飛，但係都贏咗兩隻大公仔，同2隻 tsum tsum，感覺都已經開始抵番。因為一隻小飛像都值百幾蚊，所以依家有得玩又贏到公仔，都好似算抵玩喎。

最後2張飛我哋就都只係贏到個安慰獎同襟章。

正所謂開心就唔好俾佢停，玩到熱辣辣大汗叠細汗，就買條雪條請埋佢哋食。

諗住休息一陣，點知又見到巨星，忙住要去打咭啦！

然後我哋行番出去美國小鎮大街，參加『Pixar水花大街派對！』

起初以為只係少少水花濕下身，原來真係好勁呀！好似潑水節咁，射到大家全身濕哂。

而且架車好靚呀！知唔知車上面個星星圖案球，係Pixar好有代表性嘅標誌，差唔多每一套Pixar的電影都會有呢個星星波出現㗎！

玩完哂幾個『迪士尼巨星嘉年華–大玩水花』主題活動之後，到小朋友話事時間，佢哋想去邊就去邊！第一個最想去最掛住的，梗係『小小世界』啦！

芊芊話「媽咪，呢個Elsa好似你呀…個肚腩！」(個女幾時變得轉數咁快)

去到夜晚準備要欣賞“We Love Mickey!”大街投影盛演。

一陣間就會有大型投射呈現係兩邊的小鎮牆

見到眼前一個小舞台，好明顯最後會有Mickey走出嚟啦！

跟住我哋仲睇埋巡遊，實行玩到最盡。

今次真係玩到樂園閂門，把握最後幾分鐘去埋最後一場『鐵甲奇俠飛行之旅』。

今次呢個暑期夏日盛事『迪士尼巨星嘉年華』，大家記住帶定多套衫入嚟大玩水花啦！

Photo bySony A7IIIFE 28mm F/2

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分:10分

呀劍評語:每年暑假的最期待畫面，就係入嚟香港迪士尼樂園玩，今次仲大玩水花，除咗可以同一眾巨星打咭，仲有好多全新活動遊戲，超啱一家大細入嚟玩！

《迪士尼巨星嘉年華 – 大玩水花》

一大班迪士尼•彼思的朋友已經熱好身，準備好同你大玩水花！從6月21日起至9月2日，《魔海奇緣》的慕安娜、米奇老鼠與眾多迪士尼朋友現身樂園，呈獻最繽紛熱鬧的夏日盛事──「迪士尼巨星嘉年華」。

1⃣ Pixar水花大街派對！

2⃣魔海奇緣凱旋慶典

3⃣“We Love Mickey!” 大街投影盛演

4⃣《超人特工隊》超能駕到！

5⃣加利布尼市集

6⃣Cookie – Duffy新朋友

(以上資料更新至文章當日)

Facebook專頁:呀劍萬帥 kimfamilytravel

Blog網誌 :www.kimfamilytravel.com