親子好去處 野餐好地方 鬧巿中後花園 全港配水庫草地大揭秘

港九新界分別有以下配水庫，但唔係個個都有大草地可以野餐郊遊，有幾個值得推介俾大家！(資料未能詳盡，還在更新中，如有錯漏請更正)

港島

箕璉坊配水庫休憩處

筲箕灣配水庫遊樂場

薄扶林食水配水庫

香港仔海水配水庫

堅尼地城配水庫遊樂場

馬己仙峽配水庫遊樂場

柴灣北配水庫遊樂場

玉桂山配水庫休憩處

鴨脷洲配水庫遊樂場

北角海水配水庫休憩處

北角配水庫遊樂場

雲景道配水庫遊樂場

黃竹坑配水庫休憩花園

干德道配水庫遊樂場

香港摩星嶺周配水庫

九龍

馬頭圍配水庫遊樂場

蝴蝶谷食水主配水庫

馬己仙峽道三號食水配水庫

觀塘上配水庫遊樂場

藍田配水庫遊樂場

油塘配水庫遊樂場

京士柏上配水庫遊樂場

油麻地配水庫休憩花園

樂富配水庫

黃大仙配水庫遊樂場

石硤尾配水庫遊樂場

石硤尾3號配水庫

慈雲山邨配水庫遊樂場

何文田西食水配水庫

東何文田配水庫遊樂場

新界

昂坪食水配水庫

欣澳食水配水庫

白石角食水配水庫

長洲食水配水庫

葵盛配水庫休憩處

沙田北配水庫射箭場

樂富配水庫休憩花園

水庫草坪真係買少見少，因為好多都俾政府封咗，但係今日去呢個樂富海水配水庫草坪就仲去到！

由港鐵站行出嚟轉左向樂富廣場上斜咁行

行到盡頭就會見到有條樓梯

樓梯轉彎位就會見到呢個咁大嘅指示牌

上到去接埋D朋友仔就沿住聯合道對面嘅富安街直上山

沿途見到右手邊有一條樓梯，仲插住好多塊警告牌喺度，有電電好驚！

行山必備/指定動作：執樹枝！

哥哥好開心周圍跑跑跳跳！

行到呢個位置會見到水庫入口

但係有鐵閘封咗！喺呢個時侯以為咁黑仔連呢度都俾政府封埋

但係我喺facebook見到有人11月先嚟過！

不過大家唔駛驚…原來只要轉左繼續行就可以去到

喺呢個時侯提提各位右手邊有個公廁，大家如果人有3急就去咗先

轉左再行前兩步就會見到呢個水庫閘1960(老過我呀)

再行前2分鐘就會見到一個大轉彎位同埋有條小斜路行落去

原來係一個小涼亭，涼亭俾樹包圍，我哋都去到時都見有兩個人喺度瞓緊覺

轉埋呢個彎行上去就見到大草坪啦

呢度個正確名稱叫做「樂富配水庫休憩花園」

嘩Waaaaa！真係好大喎

以我估計差唔多有三分二個正規球場咁大

今日1月1號正直冬天，但係見到草坪嘅草都好靚！

最重要係我成日講嗰樣「最緊要少人！」

喺我連舖地下都未預備嘅時侯

就即刻掉個足球出嚟俾佢哋玩，唔好阻住我哋Set場！

呢個草坪最特別地方係中間分出3條磚路

哥哥之後就走去爬樹！同朋友仔執樹枝，呢度仲有幾棵樹斬咗可以玩梅花樁

我哋喺大樹下舖咗地墊野餐！

媽咪朋友送咗D小禮物俾小朋友一齊玩

芊芊見到有條已死甲蟲跟住執支樹枝去「了」佢

媽咪們晒冷！喺呢D時侯通常女人都會將平時唔會做俾老公食嘅嘢做出嚟同大家分享

小朋友就最開心不過！唔駛做，又食又拎！

總括我帶住兩隻嘢周圍去咁多地方
最開心笑得最真實就係在大自然遊玩！
即使去甚麼甚麼嘉年華之類活動，當玩完機動遊戲之後停落嚟
歡笑都跟住一齊停落嚟，留低嘅就只有倦意同埋扭計

相反每次嚟到大自然，佢哋一來可以自動波自己去玩去探索
二來唔會見到佢哋話攰
第三一定唔會出現嘅情形 －扭買玩具扭玩呢樣嗰樣！

呀芊你實在太靚我只有放哂咁多張相！

哥哥同呀芊喺度玩掟飛標！(芊芊你做歪口歪面)

呢個係咩姿勢呢？少林功夫定醉拳

喺呢度最麻煩一樣嘢就係去廁所

小朋友輪住話去廁所，我要帶佢哋去完一個又一個

喺呢度可以望到過去隔離，我估係水庫天台卦！

除咗周圍跑就只有周圍跑！一個大地方任佢哋跑走跳…一個字「爽」

跟住仲拎住部相機影螞蟻，搵小昆蟲！

唔知佢哋喺度講乜？芊芊好似鬧緊哥哥咁

連我都瞓咗喺草地度倒轉同佢哋影相，加埋今日咁好嘅天氣真係好舒服！

玩到三點幾我哋就準備落番山，上山落山都只係十五分鐘，仲可以去樂富廣場High番個Tea

呀劍評語:唯一唔方便嘅地方都係去廁所，每次都要行差唔多5-10分鐘來回

樂富配水庫休憩花園簡介

樂富配水庫休憩花園位於廣播道附近，擁有一片自然草地。連接樂富公園, 花園可供遊人散步休憩。公園内的山坡上亦有塊小墓碑。

地址

香港九龍樂富富安街

開放時間

早上七時至下午六時

交通

港鐵「樂富站」B2出口，沿指示牌步行約15分鐘。

油麻地配水庫休憩花園

其實香港有好多個配水庫, 但係開放予公眾的就開始唔係好多! 有部份因為有人用作私人用途或噪音滋擾被投訴, 所以禁止進入不再開放!
我介紹出嚟都係希望大家有機會可以享用, 好好享受這個又方便又美的地方! 所以請好好珍惜!
今次我哋個行程係先到配水庫然後再落去京士柏遊樂場玩

其實超易去, 只要喺港鐵油麻地站D出口U turn向後行

過埋消防局就會見到條超長樓梯!

一直行呢條天梯彎都唔駛轉就會見到!

真係長到冇朋友! 見唔到終點

但係其實行15分鐘內都會到!

一個好廣闊既大草地, 仲有條跑步徑! 呢度唔多人, 10隻手指數得哂!

我哋打開大帳幕, 放低哂D嘢, 跟住佢哋兩個就已經唔知跑咗去邊lu

同樂富配水庫一樣, 都有個水庫閘喺度, 呢個仲耐歷史有1932-1934年!

另一邊其實係氣象館, 成日聽到京士柏測天氣就係呢度!

真係好寫意!!
哥哥妹妹執咗好多樹枝番嚟, 我放喺草地上面扮路軌, 佢哋就當跳飛機咁玩!

妹妹好利害, 沿住緩跑徑跑咗三個圈!

妹妹突然間喺度做熱身, 但係你好似調轉咗喎! 下次要先做熱身先去跑呀!

哥哥就喺度扮馬騮四隻腳行又喺個地度碌嚟碌去! 兩個嘢連鞋都除埋

俾佢哋狂奔一陣後番嚟帳幕度食吓嘢抖一抖玩陣UNO!

喺嗰一刻真係好想時間就停留喺度, 喺呢度真係好自在好放心咁休息!
佢哋兩個一時行出去大草地跑跑跳跳一時又跑番入嚟帳幕休息食嘢
真係好FREE! 跟住佢哋又走咗出去捉雀仔(其實佢哋都係想跟住佢哋, 唔係真係捉同嚇佢哋)

我哋喺呢度都已經消磨咗成2個幾鐘! 佢哋兩個玩到唔捨得走
呢度唯一一個最麻煩既地方就係冇厠所, 如果要去厠所要落到去京士柏遊樂場
但實在係太遠啦, 所以我同佢哋兩個都係去落山是但搵個暗位淋花就算

其實步行樓梯可到以太空月球主題的京士柏遊樂場繼續玩

呀劍評語:既方便又快捷, 易去又少人! 唯一缺點係冇洗手間!

油麻地配水庫休憩花園 簡介

由 油麻地眾坊街經一條長樓梯向山上走，再經過一些居民自製的小樓級便可到達山頂。山頂是油麻地配水庫休憩花園和天文台的京士柏氣象站。花園內設有避雨亭和公園椅 其他設施包括長者健身設施 – 踏級練習、手臂轉板、上身的伸展強健鍛鍊、單腿平衡、強健背部、小腿伸展、半前蹲、腿鍵伸展

地址

九龍油麻地京士柏道

開放時間

每日24小時開放

京士柏上配水庫遊樂場

我哋由太子乘搭41號城巴，大約12個站(需時35分鐘)，去到聖三一堂中學車站落車

落車之後一直向前行1-2分鐘就會見到閘口

見到指示牌寫住「京士柏食水配水庫」就係呢度行上去啦！放心，唔係好難行

行冇幾耐就見到有個休憩區！如果真係行斜路好辛苦可以坐低抖一抖！

繼續再行上見到分叉路，大家只要靠左向上行就可以了

轉過嚟沿斜路行上去！其實整條路程不到5分鐘(我只係想詳細D影咁多張相俾大家睇)

見到配水庫就到遊樂場啦！今次呢個水庫嘅年份係1960年，希望可以儲齊同水庫影嘅相^.^

沿途其實都幾多靚花睇㗎！如果細心欣賞風景植物甚至昆蟲，其實短短簡單的路程都可以很不一樣很豐富充實

配水庫隔離有條樓梯行上去，就到遊樂場㗎啦！

其實叫遊樂場都真係唔係好貼切，因為只係得兩個球場！一個兒童遊樂設施都冇！

不過地方尚算空曠，秋天時分嚟散吓步行吓山做做運動都幾好！(因為今日太曬了)

呢度都有少部份草地，不過草比較長！(唔知係冇人修剪定係特登留咁長…)

如果喺呢度野餐都唔錯㗎！

同哥哥喺度踢咗陣波都真係熱到頂唔順！踢咗幾分鐘要放充棄去下一個好去處了

沿住樓梯或斜路可以上到去－忠義街花園散吓步，再搭Lift落番去忠義街，可以玩埋何文田體育館兒童遊戲室玩

呀劍評語:既方便又快捷, 易去又少人! 只係草地佔的地方不多，另外上忠義街花園設有洗手間。

京士柏上配水庫遊樂場簡介

其他設施包括1個硬地7人足球場

地址

九龍何文田忠孝街

開放時間

每日上午7時至下午6時

查詢電話

2330 1708 / 2762 2083

黃竹坑食水配水庫(黃竹坑配水庫休憇花園)

由南朗山道山腳出發，行大約10分鐘就會見到配水庫入口，圖為配水庫入口向山腳方向影

由大鐵閘鐵絲網望入去見到配水庫路牌，隔離就係休憇花園入口

花園沒有啥甚麼特別地方，只係有少許坐位及公廁

如果想行埋上配水庫頂層就可以轉右經過藍色鐵閘向山上行

一個”Z”形的斜路，大約行5分鐘就會行到上去頂層

經過一條樓梯上到”Z”另一段

向前行再見到另一條樓梯

轉左再上埋呢段樓梯就到，可惜呢度又係唔俾帶狗入內

園內就只有一個有蓋涼亭同埋緩跑徑，周圍地方都有少部份係草地同埋老友記健體設施

兩個細路話咁快就已經踩單車同Scooter走咗lu…

一路都見到好多好靚嘅花同植物

喺頂層可以望番去深灣，見到好多遊艇，而且秋天上到嚟又有涼風吹住真係幾舒服㗎！

喺園中間位置有個涼亭佈滿樹籐，感覺都幾靚㗎

呢個方向見唔到樓景，真係好似去咗天空之城咁

呢度真係可以話係隱世花園，秋高氣爽上到嚟野餐踩吓單車，一個人都冇真係好似包咗場咁，不過唯一冇咁方便都係同其他配水庫一樣，就係去洗手間！如果大家要方便就唯有落番去休憇花園的公廁了，一來一回大約10分鐘！

成條緩跑徑變咗佢哋踩單車玩Scooter嘅跑道！最後無限loop玩咗好幾個圈先肯走

呀劍評語:當大家諗住同一家人去大草地野餐，只係諗到佐敦谷同維園，其實香港有好多配水庫又方便又少人，適合大家去野餐踢波踩單車！黃竹坑配水庫好處真係幾乎冇人好似包咗場咁，缺點同好多配水庫一樣，去洗手間比較不方便！

地點

香港香港仔黃竹坑配水庫頂

設施

緩跑徑

配套設施

花園內設有長者健體設施

開放時間

每日24小時開放

查詢電話

2555 0103

箕璉坊配水庫休憩處

呢個配水庫唔難去，就正正位於港安醫院下面的一個小小配水庫草地，呢度多數都係就近巿民常到的地方，但係若果你悶悶地想搵一個新地方又少人又舒服咁去野餐玩玩，呢個係一個不錯嘅選擇！

不同月份有不同的開放時間，不過都一定唔會嚟到摸門釘！

呢個配水庫話大唔大話細唔細，有一個二百五米嘅跑步徑，側邊有少少空地同埋櫈可以坐坐

老實講如果喺中間空地野餐唔係唔得，不過又好似怪怪哋！因為位喺附近嘅巿民都會落嚟跑步，所以如果想都係在場外的草地小規模咁野餐都OK嘅！

在僅餘的小空地踩踩單車及板車！

大半個運動場咁大嘅跑步徑

在場中間大草地望上去可以見到港安醫院

其實塊草地都幾大，足夠俾小朋友喺度任跑任跳！

在配水庫的另一邊出入口

鐵絲網圍住不能到達的另一塊空地

呢邊剛剛可以擋住整個日落，唔怕西斜好曬！

一場嚟到就跑番個圈熱吓身先！

那邊廂哥哥就拎起拍打番場羽毛球

超高技術嚟個飛撲救波

呀妹跑完一個圈番嚟都未夠喉！跟住拎個足球出嚟去大草地踢番夠本

希望大家都可以好好咁珍惜愛護這個地方，可以讓更多朋友可以享受城巿中的綠洲！

呀劍評語:又多一個配水庫草坪好去處，所以大家唔駛再冇得揀咁去維園、佐敦谷同迪欣湖，雖然冇呢幾個地方咁靚，但係人少都係一個不金

地點

香港跑馬地箕璉坊

設施

一條全長約255米的緩跑徑 / 健身徑

開放時間

9月至4月：每日上午7時至下午6時

5月至8月：每日上午6時45分至晚上6時45分

查詢電話

2879 5617

筲箕灣配水庫遊樂場

Merry Christmas！每年聖誕總係人頭湧湧，人逼車逼，去個商場影靚相總係有攝石人。我哋反而每年聖誕都會揀一D人去我唔去，我去人唔去嘅地方走走，今年我哋揀咗個配水庫去玩

筲箕灣配水庫位於耀東邨山腰附近，喺西灣河文娛中心搭2號巴士，過幾個站喺東熹苑落車就係㗎啦

落車之後望過對面就會見到有條斜路上山

落車後行前少少就會見到個安全島，行過去對面再沿斜路上山，大約8-10分鐘度就到㗎啦

對佢哋兩個嚟講，跑斜路鬥快仲開心，我哋D老爺就慢慢一步一步咁Hea上去

望番落去東熹苑不知不覺已經行咗上去咁高

我哋當行山咁，沿路同小朋友一齊執樹葉樹枝

執執埋埋屋企勁多樹枝…

哥哥就當係把劍咁周圍舞

終點在望啦…

大閘都係閂埋咗，要轉左穿過公園先有條小路行入去配水庫

大家切記上到嚟配水庫一定要愛惜所有事物，以及保護這裡的寧靜！

記住呢度係唔可以踩單車㗎！

就係呢個小閘，往前行便到！

上埋前面幾級樓梯就到遊樂場啦！其實佢個名話係遊樂場，但係只有藍球足球場、緩跑徑及一遍大草地，所以唔好以為有瀡滑梯之類設施

這個配水庫非常好！設有洗手間，而且仲係好近好方便

成個場只得一家人喺度玩，感覺好似包咗場咁！

大草地旁就設有緩跑徑，再隔離就係個小型足球場

這裡係禁止放模型飛機…不過我當日就發現有另一家庭後尾上嚟同個仔玩囉，咪就係呢D人破壞規矩，令這裡有機會再被政府封殺囉 >.<

呢D場合我同老婆可以瞓喺度抖抖，佢哋兩兄妹自得其樂！

公園招牌玩具泡泡槍

喺度可以瞓一個下晝…

最後玩到冇嘢好玩就好沙…話要掘個窿俾D蟻可以行入地底！(心諗螞蟻都醒過你啦)
短短Hea咗兩粒鐘就番歸去嫲嫲屋企聖誕飯Lu…大家不妨嚟呢度同小朋友野餐一下(最緊要有公德心愛護環境呀)

呀劍評語:公開的配水庫遊樂場在香港真係買少見少，當然有好多朋友做壞規矩，破壞大自然同寧靜！就好似石硤尾配水庫(即嘉頓山上的配水庫大草地)，希望政府有一日可以重開

地點

筲箕灣耀興道

設施

遊樂場設有洗手間其他設施包括1個籃球場、1條緩跑徑、健體及長者健體設施、飲水機、避雨亭及座椅

開放時間

每日上午7時至下午7時

查詢電話

2562 2137

Photo byCANON 5D Mark IV,Len|EF 24-70mm f2.8L II USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

(以上資料更新至文章當日)