簡單清潤蘋果水做法【米豬媽媽】
廣告
蘋果水怎麼煮?米豬今個星期玩嘢呀…… 晚晚3點彈起身成個醒晒搵奶食, 食完仲要唔訓係都要擒上擒落, 玩到4點先訓返, 佢唔攰我都死啦大佬…….. 仲要連續一星期, 晚晚都係咁wo!! 返學問吓其他媽媽, 原來佢地d小朋友都係咁呀！老師話每年轉天氣都有聽家長咁講, 應該係忽然間太乾燥, 小朋友身體適應唔切呀，咁既然係內乾, 就煲返啲滋潤嘢飲啦~
清潤蘋果水食譜
呢個蘋果水係婆婆教我~~ 做女都飲唔小, 生咗仔, 到我煲喇
材料:
蛇果 3個
雪耳 1朵
蜜棗 3粒
冰糖(可落可唔落) 大人手指公第一節咁大粒
做法:
1. 雪耳洗乾淨後浸水
2. 蘋果刮走表面d蠟後, 去芯連皮切薄片
3. 蜜棗同蘋果片放入2公升水入面, 中火煲滾
4. 雪耳浸透後去蒂撕細, 水滾後放入煲一齊煲1個鐘
5. 婆婆話加多粒冰糖就潤啲，又甜啲, 臨尾15分鐘我都有落到~~ 冰糖溶晒就完成~
拿拿臨啪返杯先~!! 媽媽我都好燥~!! (你晚晚攬住包薯片上網唔燥就有鬼~!)
米豬一拎到手就狂啜呀~~~~~ 飲多d飲多d飲多d飲多d飲多d!!!!
煮食小貼士:
1. 一定要用蛇果, 或者d令身ge蘋果, 富士蘋果絕對唔用得, 煲完會酸ga~!!
2. 切薄片出味快, 所以一個鐘已經好夠味~
3. 冰糖其實好optional ge~ 如果小朋友未夠一歲, 唔落都OK~
4. 當水飲都得ga~~ 米豬爸爸呢幾日食咗西葯燥, 我都質佢對咗幾杯~!!
米豬豬的page~ 每日都update~
歡迎各位like&follow~ 亦都歡迎大家聯絡我同米豬豬一齊試用產品或合作~
轉季時喉嚨易感到乾燥、喉嚨痕癢，適合飲用甚麼湯水？
蘋果雪梨湯水清潤補肺養顏，有效止咳清熱，更多
秋天要留意甚麼健康問題？
事關入秋時份、天氣轉乾、轉季時，無論是小童還是大人也較易有氣管敏感的問題，加上成年人經常熬夜、也會食重口味食物，更加容易爆發… 更多湯水食譜請看：逾100款湯水食譜合集
撰文：Chloe圖片來源：米豬媽媽 資料或影片來源：米豬媽媽
