香港迪士尼樂園 仲夏夜晚會

努力完六月尾至7月頭嘅考試，終於可以盡情放鬆下啦！

四點半放咗學，衫都唔換即刻衝入去迪士尼樂園，門口已經排晒長龍攞晚會手帶，熱到就嚟溶晒，一入到去即刻急不及待衝去最新嘅遊戲！

香港迪士尼樂園喺11/6/2016開始，推出咗好多個以星球大戰為主題嘅新項目，明日世界園區改咗做星球大戰樂園，新增嘅星戰版Space Mountain同埋星球大戰指揮站，仲有星戰版新巡遊表演

精品同美食，簡直係Star Wars fans 嘅一大喜訊！

我哋熱到溶晒，即刻衝入去好大冷氣嘅Star Wars X space mountains 原力覺醒戰機，多咗好多特別效果同聲響，真係好配合主題，Jasmine仲話要玩多一次添。出口係新品區，加設所自製DIY激光劍$198-$238豪華版，又可以揀顏色，又可以揀配件，製造出獨一無二嘅lightsaber !

Jasmine 同daddy 好落力咁砌，終於完成左呢個親子創舉。

之後冇乜人排隊，就走左去同space mountain輪候位置側邊嘅巨型X-Wing戰機合照。

以前幸會史迪仔嘅位置轉咗做Star Wars人物影相嘅位置，冇咗互動嘅遊戲，就冇咗衝動用30分鐘入去排隊啦?

係呢個時候我哋買咗啲小食同埋飲品，就擔定櫈仔坐喺度睇即塲903 DJ live show

迪士尼樂園每日會有超過8場嘅劇場比小朋友仔去「絕地聖殿武士特放招募處」登記，每場表演可以有大約30位小朋友擔當劇場嘅一份子，化身成絕對小武士學員，合力擊退原力覺醒角色Kylo Ren！而我哋今日，有幸比DJ 小爺占揀中上台玩。

Jasmine 想到枱好細心咁聽工作人員介紹同埋解釋，接受呢個重要嘅訓練同任務，毫不手軟咁樣使出有型嘅招數。

但係只有六歲嘅Jasmine太入戲啦，佢見到故事發展到壞人Kylo Ren對付Jedi trainer 時，擔心到喊咗出嚟，要在場工作人員安撫，但最後見到壞人被打敗嘅時候，她就雀躍得跳起來大叫，真係令台下嘅爸爸媽媽哭笑不得。

因為爹哋係die hard fans，佢買咗啲紀念品同周圍影相，好快就到左煙花嘅時間，一早起身返學嘅Jasmine盡興而歸，回程仲要爹哋抱，一上到車就瞓着咗啦，Jasmine話暑假要來多幾次啊！

https://www.facebook.com/BonnieWongJasmineRawlinson