2018小一自行分配放榜在即 家長有咩可以做準備？
撰文：趙榮德 圖片：新傳媒資料室
派到一定要接受？
趙＝趙Sir 家＝家長
家：趙Sir，小一於11月26日放榜，教育局派給我個仔的學位，是否一定要接受？
趙：派給你個仔的學位，係你同佢揀嘅，應該係你鍾意嘅小學，自然要接受。
家：如果我經過詳細考慮，發覺「自行」選嗰間唔係最好但係又派到，我可否唔去註冊，到一月去參加統一派位？
趙：唔可以。參加小一入學之基本資格，係「從未獲派小一學位」，你既然已獲派小一學位，自然不能再參加統一派位了。
家：即係話的一定要接受被派的學位，如果我唔接受個學位，後果是否好嚴重？
趙：後果係你的小朋友被認為唔會接受公營學位，自己會去尋找直資或私立的學位。
家：萬一搵唔到學位，豈不是冇書讀？
趙：又冇咁嚴重！搵唔到學位仍然可以到教育局求救，教育局一定會幫你的小朋友搵到個學位嘅。香港正實行9年強迫教膚，在香港適齡兒童一定要讀小學。
搬屋應該幾時搬？
家：明白，咁都冇咁驚！好，如果「自行分配」派唔到，我哋心儀小學又係另一校網，我是否要做「孟母」，搬去心儀小學嗰個校網？如果搬，幾時搬？有咩手續要辦？
趙：如果你問我搬屋做「孟母」，值博率是否高？答案是：「有值博率」，因為小學有一半學位分畀統一派位，例如41校網的喇沙小學，總學額為180個，自行有90個，統一派位去年有84個，瑪利諾修院也有70個之多，值得一試！你問「幾時搬？」最遲為在統一派位申請前，即2019年1月26日之前「一個星期」，即1月19日或之前搬便可以。手續簡單，帶申請和居住的證明文件，如水、電、媒氣單，差餉單及已蓋𨤳印租約一併交給教育局學位分配組，地址為九龍觀塘偉業街223號宏利金融中心2樓2室便大功告成了！
搵校求情有冇用？
家：去小學懇求校長「額外開恩」，賜小兒一個學位，是否有用？
趙：冇用。因為在11月至1月這段時間，小學校長手上一個學位都冇。
家：校長點會冇學位？
趙：真的。香港的小學校長，在自行分配，以至統一派位完成，即翌年6月1日之後，校長才可以從教育局知道小一還有幾多學位。
家：即係話如果要從校長取學位，一定要等6月，去學校叩門，如果我而家手上的推薦信，要到6月先有用？
趙：正確。你而家去見校長，佢都只會叫你明年6月來叩門，因為佢真的沒有學位在手，愛莫能助！
家：明白。即係，如果「自行」落空，一是做「孟母」一一是明年「叩門」。多謝趙Sir！
趙榮德
前喇沙書院副校長，曾任社工註冊部紀律委員會會員，香港輔導教師協會榮譽顧問。曾任教育局家庭與學校事宜委員會副主席，熟識香港教育及香港升學制度，同時為香港大學專業進修學院之客席講師，亦為升學指南作家，現有著作多達廿二本。
下一頁：【放榜前必讀！】小一自行分配放榜Do’s & Don’ts
