BB可以食芝士 !? 揀BB 芝士又要注意d咩?

Jun 1 2017

首先BB係可以食芝士的, 至於BB幾多月齡可以開始食呢. 大家可以參考下以下呢幾點再決定, 當然如果有個別的情況大家都可以先都要先咨詢一下你地BBs嘅兒科醫生呀.

而係月齡方面, 唔同國家有不同建議 ,主要係介乎6-12個月左可以開始比芝士 BBs食. 孖媽我就係Caydan Ramsey 12個月大之後先開始比佢地食的.

另外仲要留意家族當中有無人對乳製品的食物係敏感的? 萬一真係有, 大家可以等你的BB最小 12個月大先開始試下引入芝士 ,又可以問下兒科醫生的意見. 而如果BB有哮喘 /濕疹的要更加留意, 以免因為食芝士會出現食物敏感的徵狀,或有機會令哮喘 /濕疹徵狀更嚴重呀!

提提大家最好揀經過”巴斯德氏殺菌法”牛奶製造而成的芝士 ,而且最好揀真芝士比BB食, 大前提係小d添加劑的.因為市面上很多合成芝士 , 根本唔係真係芝士 , 好似的片裝芝士同芝士醬呢d咁.

到底咩係合成芝士呢？

其實只要睇成份係就會知道, 一般合成芝士都會有芝士、防腐劑、色素、乳化劑、色素、味精等呢d唔係咁健康嘅野。最常見的合成芝士好似獨立包裝一片片個d，而一粒粒三角形個d其實都係合成芝士 . 就算市面上有d強調係BB芝士好似雪印、韓國有機個d都只係合成芝士。係我開始深入了解BBs 芝士 , 之前都買錯過一包韓國有機合成芝士比孖寶食. 所以今次真心希望同大家分享返,等你地唔好好似我咁撞板唷!

可能大家都知道芝士有好多益處，但對我地香港人黎講未必係每天必不可小的食材。其實芝士含有蛋白質、鈣、好脂肪、多種維他命B、磷等都可以提供比我地均衡營養。提提大家適合1歲之前的小B食的芝士係要matured完全成熟嘅, 最好係用經過巴氏消毒牛奶做的，而鈉含量每100g芝士最好唔好超過600mg呀。

市面上一般硬身芝士基本都係完全成熟的，超市比較常見有Cheddar, Parmesan等等，而BB係1歲之後可以開始試下Fresh cheese, 如Cottage cheese, Cream cheese等不同款的芝士 . Fresh cheese嘅發酵時間比較短，所以比起成熟芝士內嘅酵母菌無咁穩定，1歲之前的BB腸胃都仲係好幼嫩，擔心佢地的腸胃未必受到，所以suggest大家1歲之後先食開始食Fresh cheese類。大家揀芝士比BB食記住要睇清楚佢地的成份係唔係天然呀, 佢地的成份好簡單,就係奶、芝士 (culture/rennet/enzymes)、鹽咁樣。唔好比BB食埋D色素、味精，又高鈉的野加重小朋友腎臟的負擔呀~

頭先有提到鈉呢樣野, 咁到底 BB可以吸收幾多鈉呢？英國食品標準局建議，嬰兒及幼兒每日鈉的建議最高攝取量為:

初生至12個月 400mg，

1歲至3歲 800mg，

3歲至8歲 1200mg，

12歲以下 1600mg，

12歲以上 2000mg。

其實2000mg都係around一茶匙鹽咋﹗媽媽們可以因應BB嘅喜好小心選擇呀﹗

除咗比BB直接食芝士之外,孖媽我亦好喜歡加係粥同意粉入面比 Caydan Ramsey食, 只要係差不多煮好哂個陣加入去, 整溶d芝士就ok了.

孖媽我目前都係揀有機認証的芝士比孖寶食的.

其實有機亦不是必需的, 都係個句. 大家留意返成份再來選擇就可以了~

睇下佢地嘅有早餐幾有”營”，呵呵!

而呢款Cottage Cheese的保質期都係比較短的，around 2-3星期左右，新鮮!