DIY 紙巾連身裙

我：「你對 Barbie 做咩嚟呀？」

Keicy：「我除咗佢條裙，同拆咗佢個頭！」

我：「（大驚）吓！ （望真啲後）哦！你係拆散咗啲頭髮，嚇死媽媽呀！」

Keicy 笑笑口問：「呢條白色裙靚唔靚呀？」

原來 Keicy 係用一張紙巾，幫 Barbie 造咗條裙，真係好有創意呀！
喺媽媽身上，學倒點樣運用生活用品嚟做創作，叻女！

一張整摷咗嘅白色紙巾，喺 Barbie 身上就變成一條好有 style 嘅連身裙。

呢條裙高貴典雅，有少少 haute couture 嘅味道，我好欣賞膊頭位單邊斜膊嘅設計，除咗能夠突出膊頭嘅線條外，最特別嘅係，Barbie 嘅膚色令條裙增添野性嘅感覺，係華麗嘅泰山裝！

背面亦都有 detail 位，deep V 可以突出纖細嘅背部線條，而 V 尾嘅仿蝴蝶結，更為裙身嘅皺摺賦予焦點，可以話係畫龍點晴，一個字，靚！

呢條皺皺哋，cutting 咁靚嘅裙，一定要襯返個特別啲嘅髮型！

Keicy 拆散 Barbie 原先扎起咗嘅頭髮，再喺自己堆髮夾當中，搵一個心型粉紅色嘅，半夾起前面啲頭髮。

呢個髮型設計非常出色，因為條裙着喺 Barbie 身上已經有少少陽剛嘅感覺，如果頭髮扎起晒，會太 man，反而散落嚟，可以平衡返整體嘅感覺。

睇嚟 Keicy 唔止識得運用身邊嘅材料創作，更識得配合各種元素。

好期待 Keicy 下一個作品！嘻嘻！