Keicy小小攝影師初體驗

喺人人都有智能電話嘅年代，影一張相話咁易，好多家長會畀小朋友用智能電話或平板電腦影相，不過其實用相機影相，會少啲誘惑，小朋友可以更專心，唔會影完兩張相就走去玩手遊，而且呢部 Canon EOS M10 細細部，小朋友容易拎出街，但又好似電話影相咁容易操作，點一點個螢幕就可以影相，所以我選擇喺去旅行嘅時候，將佢交畀 Keicy，令佢可以喺一個愉快嘅時光同環境，輕鬆自學攝影。

Keicy 仲學《Pokémon》嘅訓練員，將隨機附送嘅 cute cute 比卡超公仔放上膊頭，即刻元氣十足，冒險精神爆升！Keicy 仲唔捨得除落嚟㖭！

相機設計好輕好方便，Keicy 全日掛喺頸度影相都唔會覺得攰，而且相機有多角度 touch screen，螢幕可以反起，盡情自拍或者企高踎低影相一樣冇問題，幾刁鑽嘅角度 Keicy 都影到。

同行其他小朋友見到 Keicy 影得咁開心，都好好奇上前問佢，Keicy 即刻同大家一齊玩，又教對方點用，連四歲半嘅表妹都好快上手，仲一齊自拍㖭！^^

影完相，只要連接 Wi-Fi，就可以喺智能手機睇返影過嘅相，當然要即刻開心 share 啦！

我亦都可以從 Keicy 影嘅相，更了解佢係點樣睇呢個世界，雖則我係媽媽，不過始終係大人，觀點與角度都唔一樣，為咗同小朋友溝通得更好，呢啲「功課」，係要做嘅。

每個小朋友都係獨一無二，所以適合嘅教育方式好重要，而真正的教育，唔係過度保護、過度指導同過度關懷，畀孩子自由發揮、自主決定，無論佢哋大個咗係點，都一定有所作為。

好似呢日咁樣，Keicy 先對公仔影咗一輪，由最初嘅「手震鬆郁矇」、「左右高低不平」、「目標唔夠中間」，慢慢開始掌握到技巧，一點一滴進步，影咗 N 張之後，又開始留意構圖，會嘗試將公仔同「道具」擺靚啲，自己又企高踎低，嘗試搵出最佳角度，務求有最佳效果，就算畀太陽曬到出汗、食晒風都仍然專心影相，精神可加！

唔知係咪影相影到有「氣場」，同行嘅小朋友走埋嚟叫 Keicy 影自己，Keicy 即刻 say yes，繼續「大師上身」，努力搵出最佳角度，雖然搞咗一大輪，但係對方好有耐性，坐定定畀 Keicy 慢慢影。

希望 Keicy 無論影相同做其他事，都不斷進步，期待將來 Keicy 會影到更多好嘅作品。

FB: KeicyKK