英國媽媽餓底之路 — 從香港出走到英倫
廣告
喺香港土生土長幾十年，三年前帶埋老公同當時只有五歲嘅仔，加埋一堆身外物出走英國。陪住我哋飄洋過海只係得一堆跟咗我幾十年嘅相簿、老公嘅心頭好figures、阿仔啲無聊玩具……（下刪過百樣物資），仲有電飯煲、電熱水壺……（可想而知「食」對我幾緊要）。我哋喺英國無親無故，又唔捨得香港美食、家人、朋友、同事，但最後都決定要走，一睇就知係「走難」啦！
在香港地獄式生活
「走難」無非因為個仔。我同老公由細到大都喺香港生活（雖然老公好細個已經入籍英國，但只住了很短時間已經回流香港），如果無小朋友，我哋一定會繼續留喺香港。但自仔仔出世，呢五年簡直是地獄式生活。喺香港兩公婆返工，其實加埋收入唔算低，但係會用嚟俾小朋友學嘢、請姐姐、食飯、買消費品，錢洗完到頭來好似乜都無，無一個正常家庭生活，小朋友亦只能返學、讀書，連玩嘅時間都無。
英國人不會變死做的「驢」
我現在喺英國住了三年，生活比較簡單，物質未必有香港咁多，出街食飯絕對唔方便，很多時都要自給自足；但對我哋大人和小朋友，可以真正學懂點樣照顧自己，學習自己不靠其他人生存。而且喺英國我可以有多啲私人時間，因為英國人不會讓自己變成一隻「驢」，不會死做，很注重自己的生活，就算要返工、返學所佔的時間不會很多，一定會預留時間俾自己去做想做嘅嘢。例如星期六、日多數係Family day，會同屋企人出去行吓公園，接觸大自然及世界，小朋友可以自由地玩。
寧願「悶」都想有自主
相比起香港，英國的確係比較悶，但如果比較起嚟，我寧願選擇「悶」。
雖然我選擇咗喺英國過有自主嘅生活，但都好掛住香港嘅一切，例如食。
屋企煮多過出去食
我發覺英國大部分嘢食都比唔上香港，餐廳好唔方便、食物選擇少、餐廳又早收（有啲星期日仲唔開添）。但係呢度啲超級市場同organic food 又平又靚 ，所以當地人都會喺屋企煮多過出去食。講開食，又肚餓喇！食個英國人好少會食嘅宵夜先！下次再講吓UK vs HK嘅飲食習慣大不同！
