N班面試題同K1大不同 專家：能深到你唔信

N班面試題目似淺實深

有個家長，問我兩條似淺實深的升學題目，那便是：（一）學前班面試題目會出些甚麼？（二）那些學前班面試題目算係深啲？我問家長為何要知道以上題目的答案，他答：「下一年個仔要考學前班（N班），要及早準備，以下為我和家長次談話內容，有興趣知道學前班發K1 面試內容的朋友，不妨細讀。

趙為本人，家為家長

學前班面試與K1的不同處

家：遲些我便要為個仔報學前班（N班），佢而家一歲左右，剛學識講說話，我想知道一般幼稚園考學前班的小朋友同考K1（幼兒班）的小朋友有甚麼不同？

趙：你問的題目，好多家長都想知道，因為有啲幼稚園，考N1同K1，都問差不多的問題，其實有冇分別呢？ 可以話俾你知，表面睇起來N1班同k1問的問題內容好相似， 譬如兩者都問一啲「 認叫題」、「 身體協調題」、「 行為表現題」，但問的方式完全不同的。

家： 趙sir， 可否用簡單例子， 逐一說明何謂題目的內容一樣，但發問方式不一樣？

趙Sir：可以， 例如問小朋友的名字，老師會用不同方式問：

學前班與K1的試題：

例如：名字

學前班（N班）：你係咪叫做陳大文呀？

K1：你叫乜嘢名或 What’s your name?

例如：講故事

學前班（N班）：試模仿故事中大笨象點樣行路

K1：故事中的老虎行得快啲，還是大笨象走得快啲？點解？

例如：考指令與認知

學前班（N班）：你將呢個蘋果放入紅色嘅箱內，或者將一支花插入箱子上嗰個窿裏面。

K1：蘋果係乜嘢顏色？蘋果與花係乜形狀？

（有些小朋友可能答蘋果係白色，因為家中姐姐多會把紅色的皮削掉，小朋友看到便是白色蘋果肉了！）

蘋果是圓的，一支花是長方形。

例如：考身體協調

學前班（N班）：唱遊律動，跟大隊一邊唱歌、一邊跳舞。

K1：跟住音樂跳舞（郁動身體）

家：趙Sir，你舉以上例子，係想指出學前班面試重視聽「指令」，夠膽人郁我郁，要與其他考生打成一片；而K1面試重視「認知」，識物件東西的名字，顏色，形狀，K1的指令比較複雜，而跳舞不止郁動身體，而是跟住就跳動。

趙：你分析得很清楚，還有無題目想問？

家：有！有朋友個仔考N班，有一條叫考生同紙板上公仔隻大手掌「high five」， 六個考生，冇一個識，唉！一歲仔，英文都未識一個，點知乜係「high five」？（互拍手掌）

趙：係， 叫考生同大手掌「high five」好深！

家：另外有一條，係「配對」（matching）題，圖片上，一個男童上身着咗件有星星嘅衫，叫小朋友從三條褲搵一條來作「配對」，佢個仔立即搵條有星星嘅褲；第三條叫考生即時模擬以下兩種動作：賽跑、跳高、跳遠、踢波，臨急臨忙叫考生做以上動作，不易呀！

趙：的確不易， 以上指出過三題，都算是學前班極深的題目，因為三條卻不是一歲小朋友能力範圍內的！

家：但是，好多家長都想子女入果間題目深的幼稚園。

趙：如果一定要入，便要操練孩子，催谷孩子，但幼稚園其實與小學不掛鉤的，就算入到，亦不一定升得好，何苦來由呢？

家：呢啲叫做群眾壓力？

趙：但係群眾好多時係盲目的呀！

趙榮德

前喇沙書院副校長，曾任社工註冊部紀律委員會會員，香港輔導教師協會榮譽顧問。曾任教育局家庭與學校事宜委員會副主席，熟識香港教育及香港升學制度，同時為香港大學專業進修學院之客席講師，亦為升學指南作家，現有著作多達廿二本。