爆! St.Paul co-ed面試題目
廣告
由聖保羅男女中學附屬小學提供嘅資料，本年度一共收到3,600份小一入學申請，比舊年上升約一成 (去年申請人數為3,200)。好多家長都知，St.Paul co-ed雖然係直資，但係有七成學額都會收番自己友(世襲生)，即係最多得42個學額係收外人，自不然係爭崩頭啦！嚟緊3日(9月27-29日)，第一輪面試會繼續進行，之後就會篩剩300人進入第二輪面試。
我知！我知！你想知考咩丫嘛！我哋問過9月25號去面試嘅家長，咦！考嘅嘢又好似唔算太深喎! 一齊睇吓考啲乜！
1) 認中英文字卡
中文多數係詞語，最多有3個字。英文就由老師讀出生字，小朋友要喺一堆字卡裡面揀番啱嘅出嚟。
2) 砌漢堡包
應該係想考小朋友嘅即時反應同基本常識，例如知唔知漢堡包係點樣？漢堡包會有啲咩餡？之類。
3) 認物件
先俾一堆物件小朋友睇，之後要認番有啲乜嘢，同擺喺邊。即係都係考即時反應、記憶力同基本認知。
4) 睇圖書
只係叫小朋友揀本書睇，睇完老師就冇問問題。可能老師係想睇吓小朋友嘅喜好、個性，同語言程度。
題目就爆咗俾你聽，不過家長要注意，今日考呢啲，唔代表你小朋友去考都會遇到一樣嘅題目，但係大概知道考核嘅方向，有時間嘅就可以準備充足啲啦!!
仲有一點要留意嘅，有家長話收到面試通知書，學校提醒家長要帶水同小食去，究竟有冇必要呢？過來人就話真係有必要！因為整個面試過程接近80分鐘，時間都幾長，帶定喺身，等小朋友考完出嚟可以補充吓！
祝大家好運喇!!
