【趙Sir教室】升中提早「放榜」縱橫談
撰文：趙榮德｜圖片來源：新傳媒資料庫｜編輯：Kayla
趙為本人 家為家長
家：趙Sir，點解你用括號把「放榜」兩個字括住？
趙：因為教育局這次是「真通知，假放榜」，所以要把「放榜」兩字加括號。「真通知」，是在3月底，教育局會用電話或書面方式，「通知」正取生家長已被取錄。「假放榜」是因為中學自行分配申請者可以選兩間中學，教育局於3月不會通知申請者被哪一間取錄。
家：「幫人幫到底，送佛送到西」，為何教育局唔索性於3月講畀申請者兩間中學之中，哪一間收佢？
趙：這是技術問題了！原來好多中學校長，在甄選自行分配學位時，都會用「面試」以及參考「教育局成績次第名單」，但這張「次第名單」卻要用到小六上學期的「呈分試數據」，如果整個程序提前進行，無形中便要強逼小六生返學冇幾耐便要考試，咁樣會增加佢哋嘅壓力，教育局於心不忍，所以唯有「真通知，假放榜」！
家：明白，教育局似乎用心良苦。不過3月「放榜」都好過7月放，至少，政府慳返15,000張紙，唔係咩？每年有5萬多人申請中一，三成參加自行分配，即係用咗15,000張紙未申請，這制度行了20年，共用咗30萬張紙，而家3月放榜，無形中慳咗好多紙，砍少咗好多棵樹，有利環保！
趙：除咗慳紙，於3月自行分配「放榜」仲幫家長慳咗讀直資嘅學費，對嗎？
家：對，喺7月放榜時，我哋家長見到個仔有直資收，就一家註冊兼畀學費，原因係直資大部分於3月放榜，而官津7月才放，無論個仔幾叻，都唔夠膽喺3月唔註冊交幾千蚊學費，因冇人知道7月間官津收唔收個仔。其實我哋做家長嘅好無奈，明知個叻仔可以讀到喇沙、皇仁、聖若瑟，但3月Level差少少嘅直資話收個仔，我點敢唔「奉上學費」。
但係一報咗直資，就與喇沙、皇仁、聖若瑟緣盡了，趙Sir，呢個提早「放榜」我哋唔使任人魚肉，是否可用新嘅選校策略。
趙：可以，以前有啲家長將最心儀中學放第一選擇，次心儀放第二選擇，把希望寄託於自行分配。而家提早放榜就最好放棄次心儀，一係就第一同第二個選擇都揀最心儀，一係就只揀一間最心儀，放棄第二選擇。
咁樣當3月接到教育局通知話個仔或女考到，你就知道被派那間一定係最好，而喺3月直資放榜時，你就可以將直資那間同你心儀那間官津作比較，如果官津那間好啲嘅，就放棄報直資。咁樣做一來慳返好多錢，二來真正幫到子女搵間啱佢讀嘅中學，三來唔使心大心細，唔知7月放榜那間中學，係最心儀還是次心儀也。
趙榮德
前喇沙書院副校長，現任社工註冊部紀律委員會會員，香港輔導教師協會榮譽顧問。曾任教育局家庭與學校事宜委員會副主席，熟識香港教育及香港升學制度，同時為香港大學專業進修學院之客席講師，亦為升學指南作家，現有著作多達廿二本。
