【趙Sir教路】在統一派位階段，點揀直資及私小？

撰文：趙榮德｜編輯：Kayla｜圖片：新傳媒圖片庫

家長問我：「我鍾意報直資便報直資，鍾意報私立便報私立，做乜要揀報哪一種呢？」

以下為不服氣的家長和我對選直資和私小的對話，有興趣選這兩種小學作為「買保險」或作為「主打」的家長要好好留意：

「趙」為本人
「家」為家長

趙：如果我係家長，我會先揀私小，後揀直資小學。

家：點解要先揀私小？私小唔係好多「神級」名校喎！

趙：非也，私小也有拔萃女小學、弘立書院、聖方濟各英文小學、德望小學，以及保良局蔡繼有學校，以上小學名氣也不俗！點解要先揀私立小學？因為根據《小一指引》，揀私小可以「兩全其美」，當私小收咗你的孩子，你既可以在私小註冊，又可以繼續參加大抽獎。

家：好似唔得喎，指引好似話私立小學俾你註冊𠴱時，要你應承唔可以再接納官、津小個學位。

趙：其實，《小一指引》係咁標寫：「已獲私立小學取錄而仍然繼續參加『小一入學統籌辦法』的申請名單，將會於2019年6月統一派位結果公佈前送文有關私立小學參考。」據我所知，大部分私小都大大方方俾家長幫子女註冊而不附帶條件的；就算有附帶條件𠴱啲私小，都只係話你攞咗佢個學位，就要放棄「大抽獎」𠴱個，即係話到6月放榜先至算。

家：到放咗榜，我發覺官、津派嗰間好過私小，我係咪可以取官、津𠴱間又放棄私小，我想知道後果係乜嘢。

趙：你簽咗字，私小可以告你賠償嗰個學位嘅損失，即係話，其實由頭到尾報私小你都可以有選擇，唔同報直資。

家：報直資冇選擇？

趙：正確。根據《小一指引》：「凡獲直資小學取錄的學生，在接受直資學校小一學位後，將不能透過小一入學統籌辦法獲派小一學位。如他已透過『小一入學統籌辦法』獲派學位，該學位亦會被取消。」即係話在你註冊直資小學後，官、津無論是已派或未派都會被取消。最慘的是，「直小」往往早過6月放榜，例如你用「漁翁撒網」方式報了以下5間：培僑書院、香港浸會附屬學校王錦輝中小學、漢華中學、播道學校、聖瑪加利男女英文中小學，而全部都收你的兒子，但你在大抽獎卻報了喇沙小學，我想問你，是否會前往5間任何一間註冊？

家：我去任何一間「直小」註冊，但兒子卻失去讀喇沙小學的機會；唔註冊，又驚佢在「大抽獎」抽唔到喇沙，我真係唔知點算！

趙：所以我要俾家長一個忠告，如報直資小學又要參加「大抽獎」，一定要揀官、津同level𠴱啲直資小學。舉例，如在「大抽獎」報咗喇沙，在直資小學就要報拔萃小學，或聖保羅男女小，否則你若幫子女報讀唔同level，到「直小」放榜，你就唔知點算了！

家：明白。多謝趙sir指點迷津！

趙榮德
前喇沙書院副校長，現任社工註冊部紀律委員會會員，香港輔導教師協會榮譽顧問。曾任教育局家庭與學校事宜委員會副主席，熟識香港教育及香港升學制度，同時為香港大學專業進修學院之客席講師，亦為升學指南作家，現有著作多達廿二本。