DSE狀元 公開奪星秘技

聖保羅男女中學今年最威
過去兩屆DSE，均有個別地區名校生彈出，躋身狀元之列，不過今年十二位狀元，全是來自傳統名校，其中被家長奉為「王者中學」的皇仁書院，仍然保持水準，連續三年有學生成為當屆狀元，穩佔狀元榜首位，而要數今年最威的學校，則非聖保羅男女中學莫屬，因為今年共有三名考生同時成為狀元，人數為眾校之首；加上考評局在7月21日公布外語類考試成績後，黃蕊獻及許延鋒都在西班牙文取得A級成績；而許延鋒本身已是16*超級狀元，遲來的A級，更令他成為「狀元中的狀元」，簡直贏到超晒班！出產首位DSE女狀元的嘉諾撒聖瑪利書院，今年亦出了一位狀元及一位榜眼；位於跑馬地的名女校聖保祿中學，亦首次誕生兩名女狀元；而協恩中學、九龍華仁書院、英皇書院、聖士提反書院及華英中學，亦各出一名狀元，成為首次晉身狀元榜的學校。

聖保祿女狀元話補習冇用
位於跑馬地的傳統女校聖保祿中學，作風一向保守低調，今屆DSE放榜，該校首次誕生兩名14*女狀元—徐詠然及黃曉晴。其中一位狀元徐詠然本身成績優異，亦預計自己可在DSE考獲不俗的成績，對於成功要訣，她認為只有努力，沒有捷徑。「好多人到DSE臨急去補習，或者貼題目去讀，我自己不嬲都冇呢個習慣，因為一來要使錢，二來幾百個人都係睇同一份notes，作用唔大，所以每次考試我都會出盡全力，讀哂成個課程嘅嘢，感覺更實在。」除了用功，詠然口袋裏還有一些考試的小秘技，來對付中文科。「平時喺報章、網上睇到一啲有用嘅句子，我就會抄低落自己本佳句集，得閒就攞出嚟睇，睇吓作文嗰陣用唔用得着。仲會一日睇一篇文言文，除咗做上面嘅練習題，仲會將啲唔識嘅字抄低，再搵番解釋，咁就可以令記憶深刻啲，對閱讀理解好有幫助。」詠然已選定中大的政治及行政學系為入U首選，她期望在擺脫中學的填鴨式教育後，可在大學建立自己的思考方式，將來從事記者或文字編輯等工作。

華英「巴打」摸清考評局個底
位於何文田的Band1英中—華英中學，繼2005年出過一位高考狀元後，今年再出了一名16*超級狀元楊志聰。雖然志聰升上高中後年年考第一，但他並不是寒窗苦讀型的書生。他積極參與聯校活動，閒時又愛上「高登」同巴打吹水講時事，所以他直言在現今考試制度下，死背硬知識亦無助考得高分。「我鍾意研究考評局嘅評分文件，裏面會講佢哋鍾意咩特質嘅學生，題目點答先會中，例如可以時間留意題目上嘅字眼，『詳述』、『簡敍』、『解釋』，就已經講緊佢想你答幾多，你要點樣去答。」志聰亦認為，知識是需要時間浸淫和累積，所以他每天上堂前都會把將要學的先看一遍；而放學後又會再重溫一次，以加深記憶，「我鍾意教人，因為喺我教人之前，我自己一定要熟悉同了解咗嗰件事先，所以到考試前就可以輕鬆好多。」

聖瑪利女認清自己的強項
油尖旺的嘉諾撒聖瑪利書院，今年出了一名14*狀元黃靖桐，以及雖是考獲15*但英文只有5*級的榜眼王美瑜，成績在全港女校中可謂首屈一指。有不少考生都認為，DSE考題題形多變，問題模糊，難以掌握得分標準，靖桐在準備考試前都有出現過類似的疑慮，最後她選擇到補習社尋求協助，「我自己都有研究past paper，去了解考評局嘅出題勢向，不過補習老師會同你分析點去審題，同點答先會中，如果要喺短時間內掌握答題嘅技巧，補習係折衷嘅方法。」除此以外，靖桐認為考生應該認清自己的強項，早作準備。「例如作文係選答題，通常都有議論文同抒情文揀，我自己寫議論文叻啲，所以平時睇報紙就會留意啲重大議題，抄低佢嚟做例子，如果遇到啱嘅題目，又舉到貼近時事，又適當嘅例子，考官嘅印象都會深刻啲。」

協恩妹靠狂操卷
協恩中學首次出DSE狀元，就是一個16*超級狀元，認真厲害！今次榮登狀元榜的協恩妹陳詠妍，雖然平時在校理科科目都考全級第一，不過中文、英文同通識的名次都在一百名外，所以今次DSE能考獲佳績都有點意外，自言沒有特別讀書秘技，只是肯花時間去鑽研及狂操舊試題。「我由一九八幾年嘅會考同高考卷開始操，咁可以了解考評局嘅出題趨勢，好似生物科以前都係肯背書就考得好，依家就偏向考應用方面嘅嘢多，接觸多啲唔同嘅題形，就可以掌握唔同嘅答題技巧。」至於令很多考生生畏的中文及通識科，詠妍指因兩科題形變化太多，所以她除了有到補習社補習，收集更多範文參考外，亦要感謝校內老師的無私付出。「中文科有五份卷，我哋每份卷有唔同嘅老師專攻去教，平時都會俾好多額外練習我哋做；喺Study leave嗰陣，我哋就算交幾多作文番去，老師都會好樂意幫我哋改，同我哋檢討，所以進步咗好多。」詠妍自中三開始就經常參加科學比賽，故未來希望投身醫學研究，首選會是港大醫學系。

KC仔話要讀得通
平民名校英皇書院今年亦出了一個基層14*狀元麥志鏘，雖然這名KC仔最初估計自己最差都有30分，不敢期望會中狀元，但其實他一直是校內高材生，年年又考學科第一、全級第一，平均一年掃走十個校內獎學金，所以校長陳胡美好都認為他是實至名歸。至於考試秘訣，志鏘認為最緊要識得融會貫通，不能一味死背，因為現在的公開試題不會如以前般直問直答，所以應要有長遠的計劃，「例如中四、中五我會盡量去吸收知識，再慢慢消化學過..；到中六就集中去操試題，有.知識根基，咁就算面對咩題形都可以應付自如。而且讀書應該重質，我唔會規定自己每日溫幾耐書，反而每日都會訂個目標，例如作一篇文、做幾多份past paper咁，做到先會休息。」志鏘平日熱心義工服務，視做義工為減壓方法之一，故他希望入讀港大醫學院，將來加入無國界醫生。

撰文：Joanne
攝影：Paul Choi、新傳媒資料室（部分相片由受訪者提供）