小一統一派位填表法 家長學好 要入喇沙、聖若瑟無難度

趙為本人 家為家長

小一入學統一派位「甲部」可選少於三間心儀學校

家：統一派位，「甲部」有三個選擇，是否規定要填滿三個格，如果是，又點填，不是，又點填？

趙：冇規定一定要填滿，你冇三間心儀小學，就唔需要填滿，你住邊個校網？

家：我住「油尖旺區」31校網，我只心儀油麻地天主教小學（海泓道），其他的只麻麻地鍾意。

趙：其他校網有冇心儀小學，有便可以填落去。

小一入學統一派位可任意選擇所有校網小學

家：其他校網都可以填咩？咁我鍾意拔萃男書院附屬小學、喇沙小學、聖保羅男女中學附屬小學、聖若瑟小學。

趙：你只可以填官立同津貼小學，拔萃男書院附屬小學同聖保羅男女中學附屬小學是直資，不是官津小學，所以不能填，反而你可以填喇沙小學同聖若瑟小學，這兩間雖然不在31校網，但「甲部」可以揀任何校網小學，所以可以接受。

家：我應該填次心儀小學嗎？

趙：我不贊成，因為如果你填31校網嘅次心儀小學，例如德信學校，萬一派到，你一定要接受，你一接受，對你個仔來講，整個派位機制便即停止，即係話你喺乙部嗰三十個選擇完全失去，你話是否值得？

家：係喎，我喺乙部填油天（海泓道）嗰個第一個選擇豈非冇咗，唔值得呀！好！乙部又點填呢？

趙：乙部有三十個選擇，你點填呢三十格呢？

家：我會將我嘅心儀小學，由第一間至第七間依次序填落去，啱唔啱？

趙：好多家長用你剛提出嘅方法，發覺派唔到嗰七間，竟然派剩末第八、九間。點解？因為排位係逐個選擇派，例如你第一選擇油天（海泓道）派唔到，第二選擇德信便要等，萬一下一個参加者嘅第一選擇係德信，在下一個嘅第一選擇又德信，連續五十幾個嘅參加者第一選擇都係德信，咁樣你嘅第二選擇便冇晒學位，跟住你嘅第三選擇都可能被其他參加者用第一選擇把學位「抽空」，如此這般，再輪到你，便有可能由第一至第七選擇都因學位被「抽空」而派唔到俾你，你只獲派第八個選擇了！

家：那如何是好？

趙：我提議你把最心儀填第一位，搏好運氣。如落空，則表示你運氣麻麻，若然如此，便要避？怎樣避，請將第四心儀、第五心儀小學，移上第二同第三位，你填表的心儀小學次序應該是第一、第四、第五心意，餘中可以把第六、七心儀填上，二、三心儀殿後。這樣填有很大機會被派到頭三位心儀小學，因為歷年頭三位有60%派到的！

家：明白，是否要報直資及私立小學？

趙：為穩陣，最好報幾間以備必時之需！

家：知道，多謝趙Sir提供寶貴意見！

趙榮德
前喇沙書院副校長，現任社工註冊部紀律委員會會員，香港輔導教師協會榮譽顧問。曾任教育局家庭與學校事宜委員會副主席，熟識香港教育及香港升學制度，同時為香港大學專業進修學院之客席講師，亦為升學指南作家，現有著作多達廿二本。