囝囝抽筋暈倒 楊證樺：所有嘢都可以唔要，我只要個仔
撰文：Sunday Kiss、Ling｜圖片來源：《1+1的深情》截圖、部分相片由受訪者提供｜攝影：Killy Sung
囝囝抽筋暈倒 楊證樺：人生去到嗰一刻，原來所有嘢都可以唔要
楊證樺同沈可欣擔任由田蕊妮主持嘅《1+1的深情》嘅嘉賓，分享兩人嘅愛情故事，當中佢哋提及囝囝楊宏志 （Eugene）上年突然發燒，朝早帶咗囝囝睇醫生食咗退燒藥，但夜晚依然唔退燒。楊證樺揸車去醫院途中，囝囝突然抽筋暈咗、失去知覺。
沈可欣已經喊到死去活來，以為囝囝走咗，好彩10零秒之後囝囝有返喊聲，楊證樺個心先定落嚟少少。
去到醫院，囝囝再度失去知覺，醫生馬上為Eugene進行急救，好彩最後平安無事。沈可欣憶述當時有人同佢講「頭先你個仔個嘴變咗紫色」，佢話佢寧願唔知道，嚇死佢哋。佢哋話，依一次係佢哋人生之中最深刻嘅一次。
楊證樺講述當時嘅心情：「去到嗰一刻，我原來所有嘢都可以唔要，我只要個仔。」
楊證樺鍾意沈可欣夠師奶
楊證樺同沈可欣喺拍拖前已經相識十幾年，一直只係朋友，亦無真正合作，直至二人恰巧住喺同一區，住得近咗又開始合作拍劇，楊證樺開始追求沈可欣。
後來世界盃期間，楊證樺約沈可欣去佢屋企睇波，慢慢就一齊咗。
楊證樺以前唔定性，拍過三十幾次拖，直至遇上沈可欣。佢話鍾意沈可欣性格「夠師奶」，拉著成日唔理後果「橫衝直撞」嘅佢。
楊證樺同沈可欣由朋友，到拍拖，結婚。關係轉變嘅過程非常快，因為係有咗小朋友先至結婚，決定結婚嘅過程非常倉促，所以並無浪漫嘅求婚過程。為此，楊證樺決定要聯同朋友比個驚喜沈可欣，向佢補求婚。為咗補求婚，佢呃沈可欣要去香港沙頭角嘅城堡拍攝，偷偷哋準備直升機，送老婆一個驚喜。喺沈可欣去直升機場嘅途中，沈可欣都透露話當時求婚喺係佢睇緊電視嘅時候發生，好唔浪漫。
去到現場見到楊證樺準備嘅驚喜，感動流淚。楊證樺求婚嘅時候仲話：「喺嚟緊嘅日子我會用盡我嘅能力，守謢你保護你愛護你。」
沈可欣40歲順產生到虛脫
遲來的緣份仍能促成小生命到來，Janice以40歲之齡順產誕下囝囝Eugene，無懼風險，「我一直都有check住唔怕，因為我覺得順產比較好feel、順其自然，媽媽生仔一定痛，女人係要經歷下，而且順產對BB好啲，對媽媽身體恢復都好啲。」
Janice陣痛了十多小時，無想過生仔如此勞累，令人虛脫， 「痛我就預咗，但痛完之後嗰種攰係想像唔到，好似打咗好多場拳、跑咗好多個圈咁，好辛苦！」當刻Janice誓言生第二個一定會開刀，但看到BB健康成長，都會再選擇順產。「生唔生第二個就順其自然啦，始終都年紀大，呢一兩年都冇就算了。醫生話整個生育年齡都高咗好多，我都唔算太高，一路check住都陀得好安全。」
阿Man和Janice去年補擺喜酒兼BB百日宴，楊明（後右三）擔任伴郎。
見到個仔就叉足電
兒子轉眼間已兩歲，阿Man和Janice形容他是一個開心BB，臉上經常掛上笑容，惟他沒有耐性，比較忟憎、心急，Janice說：「佢學行會向前『舂』，因為佢太心急想行，搞到成日仆親。」阿Man笑稱兒子最喜歡出街，對身邊的事物十分好奇，即使自己忙拍劇又忙於打理餐廳生意，就算多勞累都會陪兒子出街玩。「一見到個仔就好似叉咗電，幾攰都唔記得咗，有時拍完劇返到屋企，個仔話想行街街，我都會帶佢落去行一行。」
演技精湛的阿Man和Janice，當然有應用在湊仔之上，兒子有隻心愛公仔名叫Stephen，每晚都要攬實睡覺，阿Man和Janice就利用Stephen與兒子談天哄他入睡，因為兒子對床前故事沒甚興趣，阿Man笑說：「佢係比較自我啲，我哋講故事佢冇咩反應，鍾意自己發掘嘢玩、周圍摸嘢，好似一個工程師。」看着兒子一天一天長大，阿Man猶如看到自己的童年，每日都用心教導他，並學習如何做個好爸爸。「唔可以迫佢做佢唔想做嘅嘢，適當時候都要話佢、要say no，但唔畀佢又會扭計，究竟點樣取得平衡呢？湊仔真係一個好大學問。」
