汪琳囡囡 我想做設計師
●撰文：Ling
●攝影：Clay Lam （部分相片由受訪者提供）
●場地：Kids’Gallery Hong Kong
汪琳囡囡 我想做設計師
汪琳在戲中由少女變為人母，現實中她亦有一名四歲女兒張梓彤（Kesha），她自誕女後退出幕前，專心相夫教女。她發覺囡囡特別喜歡畫畫，常在旁發掘其創意，Kesha透露將來有意做設計師，訪問當日見到一盒設計師玩具即愛不釋手，研究顏色及視覺圖畫，年紀輕輕已向「我的志願」進發！
「海琳」少女變人母
電影版十五年後再拍攝，一班演員都好大變化，變得更成熟、更靚仔靚女，汪琳覺得眾人中誰變化最大？「梗係我自己啦，由當年好瘦嘅小妹妹，依家長大做咗人媽媽，有個四歲小朋友，仲肥咗好多。」
2011年誕女後，汪琳淡出娛圈湊女，希望花最多時間陪囡囡長大，雖然一直戲癮未甩，惟未有心動復出，直至《十》片開拍電影版，劇組邀她復出，連張智霖也加入游說。「有日撞到Chilam，佢話如果我得閒嘅話，過嚟飲杯茶，當食下嘢囉，拍攝好輕鬆㗎咋。既然大家講到咁，我就應承佢哋啦。」
汪琳之前從未離開過囡囡去拍戲，第一日拍攝就要過澳門，還撞正囡囡考試，其後更嘔吐不適，令她整天心掛掛。「雖然澳門一個鐘船程好近，有咩事都可以盡快返嚟，不過都好掛住佢，打返屋企又話佢喺車度嘔，好彩冇乜大礙。」Kesha好快適應沒有媽媽的日子，有其他人陪就得，汪琳說：「之後嘅拍攝佢有婆婆同工人姐姐睇住，佢都唔係咁掛住我㗎咋。」
其後在港補拍醫院戲份，在一間文娛中心搭建而成的醫院景拍攝，汪琳帶了囡囡去探班，Kesha搶答：「去咗三次！星期一、二、日！」她奇怪為何文娛中心會有醫生護士出現，又推病床出入，周圍都打燈設布景，覺得好有趣，「俾佢見識吓都幾得意嘅。」汪琳笑道。
進修兒童心理學
汪琳的形象一向乖乖女，為人母後不再溫柔，拍攝當日也不時「發母威」，喝令囡囡聽話，「全屋最惡係我，婆婆同爸爸係慈祥，有時仲話我唔需要咁惡對佢啦，但我覺得適當發惡好啲，唔係好易縱壞，所以湊小朋友都係一門學問，唔可以太硬太軟，唔可以俾佢要乜有乜，不過又唔想日鬧夜鬧，都幾辛苦。依家啲小朋友太聰明喇，你太腍善佢仲食住上。」
不過惡得多有損親子關係，囡囡可能怕媽咪鬧，收起更多秘密不敢宣之於口，為增進母女溝通，汪琳開始進修兒童心理學課程。「依家我對住個女最多，呢方面都想增值吓；如果我仲拍緊戲，可能我會進修演戲。」她最擔心囡囡將來踏入青春期的變化，想透過進修未雨綢繆，「囡囡現階段我唔驚，仲喺我控制範圍，我喝一聲佢就驚啦，我最擔心佢青春期，咩都收收埋埋唔出聲，有心事都唔同父母傾訴，呢方面我最需要了解多啲。」
轉讀本地幼園學規矩
現就讀K1的Kesha，是由國際學校轉讀本地幼稚園，汪琳覺得之前囡囡開始「鬼妹化」，希望她在香港長大，似番個本地人。「我同先生都係local school長大，我又唔想佢咁早去外國讀書，始終都係中國人，想佢學好禮貌、規矩、儀態為先，local school比較重視呢啲，國際學校好freestyle，依家仲睇緊佢適唔適應，暫時覺得佢係可以被管束。如果佢真係好抗拒守規矩，唔想俾人管，個人好想freestyle嘅，再見步行步囉。」
Kesha是一個活躍的小朋友，但一有紙筆畫畫，她就會乖乖坐定定至完成，Kesha說：「我最鍾意畫Elsa、Anna（迪士尼《Frozen》主角）同Princess。」汪琳笑稱，自己從小到大都不好公主、Barbie，所以胎教開始已盡量避開公主類，「自從帶過佢去一次迪士尼，佢就愛上咗公主。」
阿女講英文似老外
部分父母千方百計避免囡囡做公主，但避得一時，避不到一世，公主無孔不入。可幸的是，Kesha雖成了公主控，卻同時愛上英文，因為很多迪士尼卡通都講英文，汪琳笑說：「依家喺街見到一啲外國人講英文，佢會即刻望過去八卦，覺得大家係同類人。」
汪琳與丈夫Joey是土生土長香港人，性格絕不「老外」，竟然培育到一個似「鬼妹」的女兒，「連老師都問我哋平時屋企係咪講英文，我話教就會，但日常生活唔係㗎，可能係從學校同興趣吸收返來。」有見及此，她讓囡囡多上英語興趣班，例如Phonics及串字遊戲，另報讀了Kids’ Gallery的LCM Exam課程學習溝通技巧，由英國學校舉辦，讀完後可參加考試，取得分Grade成績。
去年流產沒留陰影
Kesha自入讀幼稚園後，汪琳與丈夫覺得是時候生多個陪伴囡囡成長，她透露去年曾懷有第二胎，但不幸流產，當時懷孕六、七周未穩定，有日做完活動回家便出事。性格樂觀的她未有因此留下陰影，下次會多加小心身子，「唔好走動太多囉，上次我冇就住，懷孕後仲有抱個女，又跑又踎，有咗唔應該咁大動作。」
經過長時間調理身體後，忙完電影宣傳就會再展開造人大計，仔女都無所謂。「個女想要多個妹妹，先生就想要個囝囝，我自己就冇所謂，如果龍鳳胎就好喇，一次過滿足晒佢哋兩個。」
醫生、作家、設計師？
「我想做醫生！我想做律師！我想做作家！」每個小朋友必答作文題「我的志願」，如果及早發掘到目標，所行的道路會平坦得多。汪琳女兒Kesha最喜歡畫畫，從三款職業玩具禮物中，她會選擇醫生、作家或設計師呢？Kesha二話不說揀了設計師，對醫生眼尾不睄，即刻登入睇睇拆禮物片段。
