洗羽絨，就係咁簡單!

天氣開始轉涼，冬衣陸續出籠，當你摷番件羽絨出嚟，發現件褸有污漬或者異味，想洗洗佢，其實都幾考起! 羽絨都唔平架嘛，萬一用錯方法洗壞咗，都真係喊得一句句。想話使少少錢攞去乾洗，就更錯! 其實一般羽絨都係唔乾洗得嘅，由於羽絨嘅主要成分係蛋白質，攞去乾洗烘乾，啲羽絨就好易變脆變碎，啲毛四圍甩嘅同時，保暖性都會大受影響!

以下教大家一個方法，包保你喺屋企自己落手洗，都又乾淨又保暖，兼且唔會甩毛!

Step 1

準備一盆暖水，水溫同手溫差唔多就得架喇，唔好太熱，加入適量嘅洗衣粉，將件羽絨放入盆度浸10分鐘。

Step 2

污糟咗嘅地方唔好用手搓揉，要用軟毛刷刷，或者用牙刷都得。

Step 3

刷乾凈之後，唔好好似平時扭毛巾咁擰乾啲水，要將件羽絨打平攤開，兩隻手順住件衫撳哂啲水出嚟，撳完之後就再過多次清水，直至洗清哂啲洗衣粉為止。注意！千祈唔好用洗衣機fing乾，因為大多數羽絨外層都係防水嘅，透氣較差，而高速運轉脫水會令件衫膨脹，加上喺短時間內產生大量熱力，可能會引起爆炸。

Step 4

過第二次水嗰陣，有一個小竅門，就係喺水裏面滴少少醋，用屋企廚房啲米醋就可以喇，用一個樽蓋咁嘅份量，就可以減少鴨絨啲異味， 將件羽絨浸多5-10分鐘，之後用手順住紋路撳哂啲水出嚟，晾乾 。

Step 5

千祈唔好直接晾喺陽光下暴曬，最好掛喺通風嘅陰涼地方晾乾。

Step 6

晾乾之後，件本羽絨好扁，可以將佢鋪喺床上面，用大衣架拍打件衫，過一陣你就會發現件羽絨變番最初咁潔淨柔軟，仲冇哂異味同污漬tim！

(圖片及文字摘自網絡)