林芊妤著瑜伽褲帶仔拜山被批不恰當 403字反擊！曾幫工人畀仔落雨出街發聲
林芊妤著瑜伽褲帶仔拜山被批不恰當 403字反擊
事緣10月4日是重陽節的日子，傳統上孝子賢孫要上山掃墓，拜祭先人。當日，林芊妤都有帶兒子上山，當時她穿著偏紫色瑜伽褲與露腰短袖衫。
然而，有網民質疑衣著不當：「拜山都著瑜伽衫。」、「佢個個性就係咁，喜歡人睇，驚人唔認得佢呀嘛」林芊妤即回覆：「我想講當日我哋係要由山腳行到去山頂，應該叫做行山，喺現場有好多嘅女仔都係着瑜伽褲，其實我真係唔明有咩問題，登高都係運動嘅一種，我唔着瑜伽褲，唔通我着條裙去會合理啲？着牛仔褲又焗又辛苦，着短褲又曬，你話我講得有冇道理啊？」仲有：「啱啱先睇到呢個comment真係眼都突，其實當日我哋登高由山腳柴灣行到山頂凌霄閣，其實都係做緊運動，全程行到身水身汗面容扭曲，咁我想問着運動衫係有乜嘢問題？總好過我着到登台咁去拜山啦係咪？同埋我之後都係去郊外風箏場野餐同放風箏，全日都係運動日﹐大家認為着運動衫褲係咪好合理呢？如果呢個世界可以少啲批評﹐多啲接受會更加美好—正所謂而家我又唔係逼你着」
其後林芊妤再於Instagram發文，指自己性格比較隨和，但都忍不住要出聲：「我有嘢講，係（喺）香港女仔著leggings，輿論一直冇減退過，好與壞各執一詞，某部份人更加將‘女仔着瑜伽褲’貼上壞標籤，但我唔明白點解着自己鍾意嘅衣著出街，都要俾（被）人討論？…難道我哋又一定覺得你嘅衣着好好睇？我想講喺呢個世界上需要討好既（嘅）人就只有自己，自己鍾意着咩出街唔到其他人理（只要合法），既然點著都會被標籤既話，我著我嘅事，由我自己標籤。」強調大家應互相尊重。但有網民再質疑她為甚麼要公審別人，她再回應：
最後她表示要我進行一個為期一個月的活動 ‘30days of leggings’：「無論食飯、行街、去Event、去買餸，任何諗得出嘅場合都着leggings(情況許可既話），我要話俾（畀）所有人聽我鍾意着咩衫係我話事，唔係你。歡迎大家呢30日，每日都去我嘅IG Story highlight，睇我着唔同既瑜伽褲出街（如果夠瑜伽褲嘅話）我要為所有鐘意著瑜伽褲出街嘅女仔出返啖氣（包括我）」
不少網民表示支持，仲有前TVB藝人李綺雯都留言力撐：「我而家都差唔多日日瑜伽褲。」前TVB藝人羅詠怡：「好多呢啲人睇咩都唔順眼嘅人，現實世界可能好可憐儲咗好多負能量，人哋點著關佢X事」運動員楊文蔚：「Support!!睇到啲留言真係白眼反到上後腦，將自己既（嘅）枷鎖加諸喺別人身上，真可悲」
工人畀囝囝落雨出街搵媽咪被批評：整病點算？ 林芊妤護航
其實林芊妤不是第一次為不公之事發聲，有次她跟老公外出吃晚飯，過二人世界，將兒子翟伯伯交給工人照顧。吃到中途，工人突然發送了一條短片給林芊妤指：「BB要落街搵媽咪⋯⋯」原來翟伯伯非常黐身，幾乎每次林芊妤出門，他見不到媽媽就會哭。當時他太掛念媽媽，即使出面正落大雨，也堅持要著雨衣在街上周圍行，尋找媽媽。林芊妤見到兒子如此掛念自己，於是馬上回家：「喂呀⋯⋯好啦我依家返嚟啦」正佗著第三胎的胡杏兒睇完片段覺得很窩心，忍不住留言：「Awww」
然而，不少網民將焦點落在林芊妤工人身上。他們指工人竟然在大雨情況下容許小朋友外出，缺乏考慮：「見到夜晚仲要落雨，我只係諗萬一整病點算？」、「咁大雨，工人姐姐唔應該同伯伯落街！」、「未經你或你老公准許，點解個姐姐會同伯伯落街，仲要落雨？」、「你姐姐真係呢⋯⋯」
林芊妤對工人很放心，不覺得工人做錯事，她解釋是因為翟伯伯喊過不停，所以工人才就範，陪他落街：「其實我姐姐平時好小心嘅，我諗我個仔太癲、唔肯就範，所以（工人）先咁做。我哋好似一家人咁，佢都好錫、好緊張BB，所以我好放心嘅。」而且她認為小朋友落雨出街根本沒有問題：「其實BB自己都想玩水，我返到屋企，BB同我講玩得好開心。」
有粉絲看不過眼幫林芊妤解釋，他們指當時天氣並非狂風暴雨般惡劣，翟伯伯有著雨衣，身邊也有大人陪同，最後亦能安全回家，不明白落雨出街有何問題。加上翟伯伯不時伸出小手感受雨點，粉絲們覺得讓小朋友接觸自然環境，總比困喺舒適圈更好：「反而我覺得個畫面好溫馨又好童真，睇得出伯伯好愛媽咪。」另有網民認為工人讓小朋友自由發展是好事，只要小朋友想嘗試，件事又沒有危險就可行：「咩咁大雨唔好帶佢落街，依家落雹咩？」林芊妤表示認同。
兩招教出堅強孩子：要適當時候放手
林芊妤曾接受傳媒訪問，分享管教方式。她大爆翟伯伯以前常常哭，性格膽小，甚麼事也感到害怕，怕沙石、怕龜和怕狗。所以林芊妤一直陪他慢慢克服，建立安全感，如今已變成愛笑小朋友。
為了培養翟伯伯堅強性格，即使他跌倒，林芊妤都會控制自己情緒，不會第一時間衝過去，而是鼓勵他自己爬起身。林芊妤解釋，適當時候放手，才對小朋友最好：
「做父母
我認為需要學習的是適當時候放手
接受他們的錯誤看開他們的跌倒
因為很多時候看著小孩撞板
出於成人的正常理解和各種經歷
心裡總忍不住想要幫個忙
然而這反而令他們無法吸取教訓
好好回想過來
我們都是一路這樣成長過來的
小時候爸媽苦口婆心的勸告
但我們卻一意孤行
過程中有很多要跌跌碰碰
嘗試各種的失敗和教訓
到最後才會走出自己人生
所以呀
作為父母真的別太折騰
也許到頭來會發現
他們的見識比我們還要厲害他的人生留待他自己去發掘吧
我就靜靜地做個避風塘
但當然媽媽永遠是最愛你的～#做媽後才明白父母的愛
#佛系媽媽」
林芊妤很關心翟伯伯的心理健康，她拒絕翟伯伯讀名校、上興趣班，只是給他報讀屋企附近的幼稚園。她認為小朋友年紀還小就要經歷面試，被人審判，會降低他對讀書的興趣，得不償失。她覺得如果是叻仔，在哪裏都會有成就，故寧願兒子在快樂環境下學習。
