秋冬燉湯｜雙蓮鮮百合桂圓燉湯 潤肺補氣安神
廣告
秋冬燉湯｜天氣轉凍，又係時候要為家人多煲一啲湯水、糖水來滋潤一下先得。最近小JM睡眠質素欠佳，唔知關唔關之前病完事呢？成日總係會半夜突然醒要揾媽媽。如果我喺身邊就要拖實手仔就瞓番，如果唔喺就會起身揾媽媽，仲喊住話以為媽媽唔見咗。為咗令小JM訓得好啲，提升全家嘅睡眠質素，我決定燉個預防失眠嘅安神湯畀家人飲。其實媽媽我都好需要飲，因為小JM一個訓得唔好，就連大家都訓得唔好，呢啲都係連帶關係。
雙蓮百合桂圓燉湯安神好眠
蓮子 ： 有助抒壓、安養心神、改善失眠及抗氧化
蓮藕 ： 有助清熱、健脾開胃，產後進食亦有助止血去瘀
鮮百合： 具清心安神、潤肺補氣、清熱止咳之餘仲有養顏嘅功效
桂圓肉： 安眠、補血，而且有改善心血管循環效用
雙蓮百合桂圓燉湯材料：
蓮子
蓮藕
鮮百合
桂圓肉
瘦肉
雙蓮百合桂圓燉湯做法：
- 將新鮮蓮藕洗淨，切成條片或小片，備用。
- 蓮子、鮮百合及桂圓肉用水稍作浸泡以除去雜質。
- 瘦肉切成小件，並汆水備用。
- 將全部材料慢慢放入燉盅之內。
- 加3至4碗水入燉盅內，並蓋好。
- 燉盅膽注入適當水量後即可開始燉湯。
- 待湯燉好即可飲用。飲用前亦可按喜好加入鹽調味。
（向左推睇相）
雙蓮百合桂圓燉湯小貼士：
美的陶瓷蒸燉寶有得揀選兩個不同模式嘅燉湯時間：養顏湯（燉兩小時）、精華燉（燉三小時），可因應個人需要或喜好而選擇時長。另外仲設有發燕窩、燉燕窩等功能。我同小JM飲嘅燉咗兩個鐘，而爸爸嘅就燉咗三個鐘，我就覺得精華燉較為濃郁啲。
資料、圖片來源：傑。斯與晴
撰文：傑。斯與晴圖片來源：傑。斯與晴
