Alton王智德揸電單車曾被反對1招令母力撐 同大陸女星撞樣 揭童年逃學原因

Alton王智德揸電單車曾被反對 1招氹掂媽媽

王智德其實在入行前早已有電單車牌，他在接受訪問時提到：「我考電單車是因為入行前我常去沙灘，嗰度無咩人去嘅私人地方，變相自己要揸車，當時我無車牌，就跟我嘅電單車師傅車尾。」他提到當時家人聽到此事全數投反對票：「家人反對是因為覺得電單車一定是危險，我是用時間證明自己行駛紀錄良好，他們慢慢放心」為了媽媽可以安心讓他駕電單車，他載6字頭的媽媽到龍翔道，讓媽媽可以放心，不用提心吊膽擔心他的安全。森美笑言：「唔扽嗰條你都唔揀㗎喎！」但王智德指媽媽事後回應：「哇，幾正喎！」

其實他的駕車技術不錯，他在接受訪問時提到成員都一致讚賞他的技術：「兄弟坐過我車的都話好，五星好評頂呱呱，我揸車安全，加上拍節目要遷就鏡頭，車速都唔可以快到去邊，我揸車時警覺性、空間注意程度好高，所以可以畀到乘客信心。」

《勁騎26》憶往生狗狗 故意忍喊有原因

森美大讚王智德主持的《勁騎26》節目令人眼前一亮，除了成功向大眾介紹鐵騎資訊，而且節目題材有趣，成功吸引非電單車愛號者的觀眾收看。王智德坦言自當初拍攝時其實也未確認拍攝內容形式，更擔心自己對電單車不熟悉，機械零件也不太了解。後來導演指導他以一個「初哥」去介紹電單車和帶出電單車相關的文化和事情。他指導演對他沒有甚麼要求，只叫他早點睡，但當時與MIRROR的行程相撞，坦言睡眠都不足夠。

被問拍攝節目的最深刻一事，王智德直言一定是「浪浪送行者」這集：「有啲內容冇剪出嚟，我第一刻見到第一個Case嘅貓貓，我嗰吓咁唔舒服，因為我以前有養過狗仔，又係呢個Size，又係白色，所以好觸動到我。但我又唔想喊苦喊忽，原來太過喊苦喊忽係會被人瘋傳，所以不如忍一忍，都要做節目嘅，後來都無刻意忍，因為啲感覺都好真實」、「第二個Case，我哋救嗰隻大狗狗，講真，遠睇以為係一嚿木，再近睇，以為係野豬，後來同佢沖涼，如果輕鬆啲做個比喻，好似剝鹹蛋，剝到最後先發現隻蛋係白色。」其實他本來有潔癖，所以他在節目中不怕髒，為離世的動物作最後的清潔行為獲網民激讚。拍攝結束回程當日剛好遇上一隻被車輛撞倒的狗狗，王智德為免狗狗再被車輛輾過，站在路中心，以肉身擋在狗狗前面，直至狗狗被送去接受治療才離開，被網民大讚有愛心。

中學曾秘密走堂似《逃學威龍》

王智德曾就讀賽馬會體藝中學，學校有多位著名的體育畢業生。他體育出色，曾踢足球，踩單車，跑步等，樣樣佳精，本身也是健身教練。他在節目中大爆自己一個中學轉校不為人知的秘密，他憶述：「我做過一件到依家，老師都唔知嘅事。當時我好想參加另一間學校嘅田徑邀請賽，咁舉辦嘅時間係Lunch後，Lunch後我要返學㗎嘛！最慘係我參加係接力賽，如果應承咗就唔可以射人哋波，然後學校就唔畀，我計過數，嗰個係空堂，我好想做呢件事，同埋我覺得著校服嘅時間無幾多，要跑就跑咗先，於是我同同學仔講；『我依家跨過呢幅牆跳過去，然後我就一聲令下，你就將我書包掟出嚟。』當我離開嗰幅牆，踏出嗰一步，我覺得自己好似《逃學威龍》，人生最似電影就係嗰一刻，事後到我完咗比賽，攞埋獎牌，學校都係無人知，『Joe Yeung老師，Sorry！』 。」

被森美獲讚似隊長 又同大陸演員徐嬌撞樣

森美大讚王智德有親和力，指他性格、笑容、感覺有禮貌也很有親和力、友善，和中居正廣很相似，很適合做隊長。王智德回應指隊內其實也有曾討論過相關話題：「係因為我自己以前玩開運動，我好清楚一隊波係點樣踢，點樣先可以發揮到team work呢樣嘢，喺呢方面好有想法。」

森美又指王智德似女仔樣：「我同佢影完張相，屋企人問我『你同邊個女仔出街？』，我Dead咗一秒，『唔係，Alton嚟㗎！』，佢係女仔樣，面細細，白白哋，對眼又矇矇哋，嗰吓係索㗎喎！」王智德笑說：「其實我個人有種反差，睇下頸以上又似女仔， 頸以下又man man哋。」他繼續指：「有人話我似一個女演員，佢係徐嬌，我都覺得有啲似。」森美小儀指二人同樣「眼細細，臉細細」，王智德趁機調侃隊友：「所以我同AK影相，我移到好前（但係AK塊面都唔係特別大呀）但係比起我……。」

最後被森美、小儀問到有沒有MIRROR演唱會飛，他指自己還未知道自己有沒有飛：「我都唔唔知自己有無，唔敢問花姐有無人演唱會飛。」現在他只專心考慮表演甚麼項目，如何能夠兼顧紅館的四面台。