十優港姐麥明詩履歷曝光無提曾做TVB 父母妙法刺激腦部發展 培育劍橋法律生

撰文：Ling｜攝影：Sing Ho（部分相片由受訪者提供）

麥明詩履歷曝光無提曾做TVB 網民：6年空白期13k都畀多佢

日前有網民於討論區公開麥明詩的CV（履歷），當中她指自已2013年做過一個月美國跨國投資銀行與金融服務公司——高盛集團公司的暑期實習工作，同年到國際化的羅蘭貝格管理諮詢有限公司做了三個月顧問。

之後就到2019年，她在被譽為「環球領袖培訓工廠」，為各國政府、跨國巨企提供顧問服務的麥肯錫工作，兩年多時間就從Junior Associate升到上項目經理。去年與其他合伙人成立Project Melo，平台賦予年輕人和企業CEO互動及運用創意的機會。

有網民發現她在2013年至2019年沒有填上工作經驗，其實那段時間是她在TVB工作的日子。2014年，她曾擔任兩個月報章實習記者。2015年，她參與《2015年度香港小姐競選》當選冠軍，翌年參與國際中華小姐競選，最後五強不入。

同年她成為TVB經理人合約女藝員，成為《#後生仔傾吓偈》主持人之一，參演過使徒行者2》、《是咁的，法官閣下》等劇。直到2019年11月，她表示會暫時會淡岀娛樂圈以發展其他事業。

網民笑言她有六年沒有填上自己任職邊間公司，等於有六年空白期，如果作為人事部，見工時一定質疑她：「唔提自己喺無綫做過嘅」、「六年空白期13k都畀多佢。利申：廿年hr經驗」、「又Jumpy（意思解經常轉工）！8k」、「唔寫埋喺TVB做，人哋問你空白期點算？」、「普通貨色，畢業佢一定無五萬」、「以30歲嚟講呢份CV得個兩年full time見得下人」

但有網民反駁：「事實證明空白期係HR呃人壓價藉口，人地有料根本唔需要解釋」、「同依家career path都無關係，梗係唔寫」、「大家都知嘅嘢費事提」、「社會名人係工搵佢，你有無見過林鄭有linkedin?」、「佢有10A入過劍橋，就算零經都X打啲廿年HR啦」

頭腦聰明曾分析王力宏聲明 鬧爆不負責任
去年，李靚蕾與王力宏在網上筆伐對方，李靚蕾與在社交平台發文，踢爆王力宏講大話，兼公開專家報告、文件，證明他有自戀型人格，是婚姻問題的始作俑者。王力宏放棄抵抗，在Facebook發表聲明，「跪低」道歉，又表示自己會承擔起所有責任，暫時退出娛樂圈。

本來以為風波就此完結，不過麥明詩於Facebook轉發聲明，批評王力宏用字不當。她表示先不評論他們的婚姻誰對誰錯：「相信大家自有看法。」但她指王力宏一句「男人還是應該承擔起所有責任」很有問題：「既父權兼沒承擔責任的意思。意思是我所謂『承擔責任』是因為我是男人，而不是因為我為我自己做錯的事情而承擔責任及後果。」她認為他有貶低女性的嫌疑：「而這個說法，是基於妻子是丈夫的附屬品的概念，『因為男人是一家之主，所以家庭的問題都是我的錯』。」最後她鬧爆他迴避不足：「況且，若王力宏真的覺得男人應該承擔所有責任（我不認同但先根據王力宏的說法去討論），那就應該直接承認錯誤及承擔後果，而不是透過『我是男人所以我承擔』來迴避面對自己的對錯和不足。」

網民紛紛留言大讚Louisa邏輯思維高，批評王力宏死性不改，沒有正視錯誤，更笑言：「大吉利是講句，如果係你遇到啲咁嘅事，都應該會係咁文筆鋒利，個男人輸硬。」

10A港姐劍橋法律畢業 剖白成材之路

30歲Louisa早已躋身「人生勝利組」：出身中產家庭、會考十優（考獲中國語文科和英國語文科5*級、以及8科A級的十優佳績）、劍橋大學法律系畢業、通過New York Bar Exam考到美國執業律師牌、香港小姐冠軍，網民都要講句：乜都畀你贏晒啦！她謙稱自己絕非人生勝利組，在學校亦非年年考第一，只是中游位置，會考只預自己7A，考到10A也震驚到「下巴跌落嚟」。

Louisa坦言自己有今日成就，父母及哥哥的培育佔好大功勞，「自我細個未有認知前，媽咪已經用特別方法去刺激我腦部發展。」她自小朝着讀劍橋的目標進發，在父母幫助下練成多閱讀的自學精神，加上考試技巧而成功。究竟如何煉成一個麥明詩？由她親自剖白。

多元玩具刺激思維

爸爸是中學副校長，媽媽是職業治療師，麥明詩和哥哥自小在中產家庭成長。當大家開始嫌棄「贏在起跑線」的說法，Louisa卻告訴大家，自己的起跑線確實比人前，不是父母在學業上催谷，而是自小用多種方法刺激腦部思維。「我睇番細個啲相，媽咪買好多玩具俾我哋，小朋友細個就係同玩具互動，諗吓點拆點砌嗰件嘢，可以刺激好多思維。」

好多家長以為玩具冇用兼嘥錢，Louisa證實了玩具好有用，「唔使特別益智，唔係太死板就得，主要係有得思考嘅玩具，唔一定係puzzle、七巧板，可以多樣化，Barbie我都有玩，鍾意幫佢着公主裙。」

小時候兩兄妹又愛玩掟波，興趣班只有畫畫及彈琴，沒被要求攞cert，都是輕鬆學，幫助手眼協調，打通大腦經脈。「重點培育我哋好奇心，由得我哋周圍走，唔會叫我哋坐定定，培育興趣只係學習基本能力，唔係要學到好叻。」

K3培養閱讀逐步加深

Louisa一直保持學琴，考到八級，唱歌跳舞才是她最喜歡的，「呢兩樣我攞到成功感，尤其喺外國學校競爭好大，而跳舞我係班中最好之一，搵到自己定位。」
刺激思維、培育好奇心之外，第三就是解難及自理能力，「細個一定要自己?飯食，即使我食足三個鐘，?到成地飯，媽咪都要俾我試，自己諗辦法解決，點樣先可以?飯入口，而唔係怕麻煩叫工人餵我。」

眾所周知閱讀對孩子有益，BB一出世父母就晚晚講故事，催谷孩子睇書，Louisa對小時候有沒有親子閱讀印象模糊，但肯定到幼稚園K3，媽媽才開始培養 其閱讀習慣。「一開始會好唔習慣，覺得悶又唔明白，但佢一路鼓勵我睇多幾本就明㗎喇，慢慢就習慣。好好彩我媽咪一直睇住我進度，當佢覺得我對某個深淺程度 嘅書開始舒服，可以自如咁睇，佢就鼓勵我睇深一層，字眼同句子深啲嘅書，逐步逐步咁進一級。」

女拔學生與自己競爭

Louisa的母校拔萃女書院， 全校女精英，人人都熱愛閱讀，「尤其是小學一到小息，個個都拎本書出嚟睇，人拎我又拎，大家營造咗個氣氛出來。」 升到中學後，人人都對自己要求提高，非常用功想做好每一件事，Louisa也被感染到，但並非互相競爭。「大家一齊讀書，目標都係考好會考或高考，所以大 家都知道唔係同對方競爭，而係自己。」

貴為神級名校的女拔，課程應該比一般學校深，Louisa只覺得英文艱深，其他科目只是一般程度。「我哋寫文平均都係寫到大人程度，其他科目就唔係，但校內學習氣氛好，可以推動大家鞭策自己，都唔需要補習嘅，我自己都冇補習，靠哥哥幫手，有唔明就問佢。」哥哥就讀聖保羅男女中學，為何不跟哥哥同校？「因為我小學已經入咗女拔萃，佢小學讀呂明才，中學先入聖保羅男女，係佢跟我讀名校，哈哈！」

兄妹分校助建立自信

兄妹從沒有在同一學校就讀，其實都是媽媽的悉心安排，Louisa解釋：「媽咪知道我細個自信心不足，見到我一直活喺哥哥影子之下，因為哥哥好多方面都好出色，所以媽咪更加唔想我哋同校有直接比較，令我被標籤為『麥明山個妹』，就安排我哋各自發展。」家長大多貪方便、入學有分加而安排兄弟姊妹同校，但的確有機會令彼此有所比較，影響成長，家長值得想深一層，同校還是分校對孩子發展較好呢？

Louisa在成長上，有哥哥做榜樣，更感激哥哥一直照顧她，「細個佢會睇住我讀書，大個就同我分擔唔開心嘅嘢，好多嘢都以我為先。」Louisa小時候曾當選過的「小太空人計劃」，都是眼見哥哥於2000年入選了，三年後自己跟着參加，「我見到佢咁威，我咪想試下自己得唔得囉。」最後她也順利入選，更適逢中國首位太空人楊利偉訪港，獲派去接機，「我威過阿哥呀！係我人生最風光嘅一刻！呢個計劃都改變咗我人生，我喺學校一向寂寂無名，入選咗之後學校就覺得，原來我都有嘢叻㗎喎。其實諗番都唔知叻咩，都有少少似選港姐，又係要出嚟talk得有膽量，能夠接受挑戰。」

備戰會考做廿年past paper

小時候一次英國旅行，令Louisa充滿人生目標，學習變得更有動力，「當時去咗劍橋，冇去牛津，我覺得劍橋好靚，如果可以喺度讀書真係太浪漫喇。」返港後，一次校內有師姐分享，她會考後沒拔尖，繼續高考，最後升讀劍橋，Louisa就決定要跟這條路考入心儀大學。「我覺得有好成績，係應該好好運用去幫自己追求一啲機會。」

確立目標有動力，加上良好學習環境及自學精神，成就了會考10A之路，「我比其他同學較早完成課程，我預先讀晒，約中五11、12月就開始做會考past paper，所以我比其他人做得多，做咗廿幾年，我2009年考，做到198幾年，啲字體好似打字機字。因為我做得多，所以考嗰陣個心好定，一開卷只覺得係廿幾年past paper嘅其中一份。」

不斷追求不斷追求

Louisa 只預計自己7A，豈料成績喜出望外，「老師話班中有三個10A，講咗兩個之後我都冇諗過係自己，仲發緊吽哣，點知突然話第三個係麥明詩，我好記得當時我個 下巴真係跌咗落去！」她放棄拔尖讀香港的大學，之後自修IGCSE同樣獲10A佳績，英國高考GCE AS全部滿分，SAT I 2280分，SAT subject tests全部滿分，劍橋大學法律系當然即收，圓了她一大夢想。

「香港咁大競爭，與其同人鬥爭，不如諗方法令自己與別不同。」Louisa一語道出，一個10A兼劍橋畢業生，如何再突破自己。Louisa很清楚自己喜歡法律，但律師並不適合自己性格，「我讀呢科唔係為做律師，係為興趣，法律某程度上係關於社會，分析點解依家啲法律係咁。但做律師要好小心睇細節，合約漏 咗個零好大鑊㗎嘛！億億聲！我唔係呢種性格，鍾意周圍走，多啲挑戰。」至於將來有何發展，可能又是出人意表，說不定真的去選特首，大家拭目以待。

備戰公開試三招

1. 多做past paper

每日做三份，一份三小時，連同對答案，總共花十小時以上，不過愈熟練愈做得快，Louisa做一份連對答案約花三個多小時，十科做廿年，做足二百份。

2. 多看評分制度

即marking scheme，要知道不同類型問題，需要甚麼類型答案，想你評論、形容一件事、舉例說明，還是只求一句精簡答案？多揣摩marking scheme就可找到方向。

3. 心理質素

精神放鬆，考前要睡得着，不然會失手。需知道考試前要勤力讀書，但不能被想像中的結果去侵蝕自己，不要想像自己的分數。

溫習三招

1. 打好語文基礎

語文是日後學習的媒體，以前她每日看一本書，並多寫作及謄文，研究如何改進文章，過程中會查成語字典或辭海，去增加詞彙應用。

2. 學習主動性

讀書有好多筆記及課本，只靠背誦和間低重點是很單向的學習，難記之餘亦難以運用，應主動找一些練習或題目去考自己，不懂回答是正常，重點是過程中自己找尋答案，加深記憶。

3. 加強記憶力

多用影像記憶法，圖案比文字易記，可將文字和圖案聯想，或把文字連繫感官，印象會更深刻，好像小時候被人弄傷好痛，多年後仍清楚記得。另外人類有短期記憶和長期記憶，需把短期記憶轉化成長期，前一晚讀完課本後，之後每日抽五分鐘複習，兩星期後仍會記得清楚，否則忘記了又重頭讀起。